Maiavilla è la vischnanca la pli attractiva dal Grischun. Quai almain tenor ina retschertga da la «Handelszeitung». Guardà sur l'entira Svizra vegn la vischnanca dal Signuradi sin plaz 20. Il podest vegn occupà da Zug, suandà da Cham, medemamain en il chantun Zug e Rüschlikon en il chantun Turitg. Per la retschertga èn vegnidas intercuridas 948 vischnancas cun varga 2'000 abitantas ed abitants. Ils criteris èn stads abitar, lavurar, segirtad ed ecologia.
Val dal Rain da Cuira zunt attractiva
Tar las vischnancas grischunas dat plinavant en egl che las 10 las pli attractivas sa chattan cun excepziun da Grüsch tuttas en la Val dal Rain da Cuira. La citad da Cuira ch'è l'onn passà anc vegnida rangada sco la pli attractiva vischnanca grischuna sto quai onn dentant sa cuntentar cun 40 rangs pli pauc e sa tschenta uschia sin plaz 137. L'Engiadina dumogna cun San Murezzan sin plaz 496.
