Ils 23 da mars 1946 è naschì a Lenzburg Peter Rudolf Lienhard. Il giuven da l’Argovia ha emprendì da sunar instruments a flad e gia cun 12 onns ha el fundà en scola sia emprima band – ils «College Stompers Lenzburg» - in orchester da Dixieland. In per onns pli tard, il 1963 èsi lura uschè lunsch: Pepe Lienhard fundescha sia emprima Big Band cun 28 musicists, e gudogna cun quella pront dus onns pli tard ina concurrenza al festival da jazz Turitg.
Il 1967 ha Pepe Lienhard cumenzà in studi da giurist, quai n’ha dentant plaschì pauc ad el, uschia ch’el ha interrut suenter quatter semesters il studi per daventar musicist da professiun. Quai è stà il pass decisiv da Pepe Lienhard. Dapi quai di ha el mess en pe bleras differentas furmaziuns cun las qualas el ha reussì success naziunal ed internaziunal. 1972 grategia l’emprim hit cun «Sheila Baby», tschintg onns pli tard suonda lura il grond hit «Swiss Lady» cun il qual el sa participescha al Eurovision Song Contest. Pepe Lienhard ha lura dentant gì avunda da quai stil da producziun da hits, el vuleva daventar bandleader ed ha uschia fundà il 1980 sia «Pepe Lienhard Big Band».
Oz po el guardar enavos sin blers decennis da success en ils quals el ha sunà cun sias bands cun bleras corifeas da la musica sco par exempel Whitney Houston, Donna Summer, Frank Sinatra ni Sammy Davis e quai per l’entir mund enturn. E na betg emblidar astgan ins il superstar dal schlagher Udo Jürgens. Pepe Lienhard ed Udo Jürgens eran fitg buns amis, els han frequentà durant 14 turneas tschients da concerts ensemen!
Medemamain festa cun Pepe Lienhard fa L’instrumentala. Mesemna ils 30 da mars datti in’ura cun musica instrumentala da Big Band da Pepe Lienhard.
