L'emissiun «Happy Day» dad SRF fa ventiraivla blers e bleras. Tar l'ultima emissiun è er Jolanda Thanei da Scuol stada ina da las fortunadas. Spetgà quella surpraisa n'ha ella dentant betg. Ella seseva en il public cura ch'il moderatur da SRF, Nik Hartmann, ha nunspetgadamain cumenzà a discurrer cun ella.
Jau hai propi fatg in sigl enorm, perquai che jau n'hai betg quintà cun quai!
La dunna da Scuol era s'annunziada tar l'emissiun «Happy Day» per chattar sia stgabella. Ina stgabella cun ina furma tut atgna, picturada cun colur alva, che ses tat aveva anc construì e ch'era stada durant decennis en sia chasa paterna. A chaschun d'ina fiera da plugls aveva Jolanda Thanei però vendì avant tschintg onns la stgbella. S'enriclada d'avair vendì l'object da gronda valur emoziunala è Jolanda Thanei s'annunziada tar la redacziun da «Happy Day» cun la supplica da chattar la stgabella.
La redacziun da «Happy Day» aveva respundì a Jolanda Thanei, ch'els n'hajan deplorablamain betg chattà la stgabella. Quai n'è però betg stà l'entira verdad. «Cura che nus essan ids enavant tar la tribuna, hai jau pensà: jau crai ch'els han chattà ella», di Jolanda Thanei.
Cura che nus essan ids enavant, hai jau pensà: jau crai ch'els han chattà ella. A mai vegnan ussa puspè las larmas cun raquintar!
Ussa pon ins sa dumandar – ina stgabella? Co po ina tala stgabella signifitgar ad insatgi uschè bler? Ma Jolanda Thanei aveva questa stgabella ina gronda valur emoziunala. Ella era ina regurdientscha da la chasa paterna e da ses geniturs, surtut da la mamma. Jolanda Thanei sa regorda anc fitg exact dal mument, cura ch'ella aveva vendì la sutga. «Jau ma regord anc exact», di ella. «Jau hai mo pensà – pertge has laschà ir ella?». Cun agid da «Happy Day» hai pia dà in Happy End: Jolanda Thanei ha puspè la stgabella en cuschina, là nua ch'ella vesa quella mintga di!