Siglir tar il cuntegn

Header

cuntegn

helveCHia Airolo survegn in «viertgel»

En dus onns cumenzan las lavurs per il segund tunnel d'autos tras il Gottard. Per il vitg sisum la Leventina è quai ina gronda schanza.

Cumparegliaziun dals maletgs

Stuschar reglader a sanestra Stuschar reglader a dretga
Legenda: Avant e suenter la construcziun dal segund tunnel d'autos. ASTRA

I para sco sch’ils avdants d’Airolo pudessan strusch spetgar enfin che la maschina da tunnel cumenza a sa stgavar tras il grip dal Gottard.

audio
Mezdi: HelveCHia – Airolo (TI) sa legra sin il tunnel nov
ord Actualitad dals 11.05.2018.
laschar ir. Durada: 3 minutas 11 Secundas.

Quell’impressiun han ins sch’ins auda las reacziuns d'intgins dad els suenter in’infurmaziun che l’Uffizi federal da vias ASTRA ha fatg quests dis: «Quai è ina bellezza perquai ch’il project resguarda la natira. Noss territori era ruinà. Per nus è quai ussa fantastic. Jau sun fitg optimistic da quai ch’il project porta.»

Ch’ils dad Airolo guardan plain curaschi ed optimissem vers il futur ha pli pauc da far cun il nov tunnel d’autos tras il Gottard. Pli impurtant è per els quai che schabegia cun quai che vegn stgavà ord il grip.

Tetg per l'autostrada

L’autostrada existenta, che passa gist sut il vitg ora, duai svanir per la lunghezza dad 1000 meters en in tunnel, che vegn cuverts cun varga duas milliuns tonnas material ord il grip. Per il vitg d’Airolo munta quai pli pauca canera ed in prà nov, che tanscha dal vitg enfin tar il flum Ticino.

Ultra da quai duai la via che maina sur il pass puspè ir atras il vitg e betg pli sur il tarment viaduct da l’autra vart da la val. Quel duai svanir. Insumma vegnan las vias d’access al vitg ed a l’autostrada organisadas da nov. Ils custs supplementars da 100 milliuns francs surprendan il chantun e la Confederaziun mintgamai mez e mez.

Che quai vegn ussa fatg uschi, ha era da far cun il squitsch e la resistenza da la populaziun d’Airolo. Atgnamain eri previs da transportar il material ord il tunnel 40 kîlometers da la Leventina giuadora enfin Biasca.

Entaifer curt temp hajan ins dentant pudì metter en pe in project nov, che resguarda meglier las spetgas da la populaziun locala, di Franco Pedrini, il president communal d’Airolo, tut cuntent: «Jau sun perquai dubel cuntent da vesair l’entusiassem da tuts da dumagnar quella sfida. Quai era cun il savair ch’ins po far insatge bel.»

Miracul politic

Tut intgantada d'avair chattà ina schliaziun che cuntenta la populaziun locala e megliurescha il medem mument era la qualitad da la cuntrada è Valentina Kumpusch. Ella è la responsabla per la construcziun dal segund tunnel d’autos tras il Gottard: «Che tut las partidas dal vitg èn s'unidas per chattar ina buna schliaziun per la vischnanca e la populaziun e vairamain in miracul politic. Ensemen cun la collavuraziun cun nus è quai stà il secret dal success.»

En dus onns duain las lavurs da preparaziun cumenzar e set onns pli tard, il 2027, duai il segund tunnel lura esser pronts. Silsuenter vegn il tunnel vegl sanà e davent dal 2030 duai il traffic charrar sin mintgamai in vial tras ils dus tunnels.

RR actualitad 12:00

Artitgels legids il pli savens