Ella è la regina dals curtins da puma dal Vallais – l'apricosa. 96% da las apricosas svizras creschan en la Val dal Rodan. Avant 30 onns devi mo ina sort, la Luizet. Oz creschan sin las circa 700 hectaras en il Vallais da quai da 80 differentas sorts.
Quella diversificaziun saja vitala en in temp ch'il clima sa mida, di il pur Olivier Comby. «Quai procura ch'ins na metta betg tut ils ovs en il medem chanaster. Sche nus avain ina perioda da plievgia a l'entschatta da la stagiun lura datti pli pauc dals fritgs che madiran baud. Vegn la perioda da plievgia pli tard lura èn ils fritgs che madiran tard pertutgads. I sa reparta uschia in zic. Ma la fin finala sa ina schelira anc adina disfar tut las sorts il medem mument.»
Resistenza climatica pli impurtant
Durant la racolta s'entaupan Olivier Comby e ses collegas regularmain cun perscrutadras e perscrutaders che cultiveschan e sviluppeschan novas sorts d'apricosas. L’intent è da barattar las experientschas, ma er da degustar novas sorts. Enfin ussa hajan ins cunzunt dà paisa sin il gust, sin la furma e colur da las apricosas e sch'ellas èn resistentas cunter tschertas malsognas, di Danilo Christen, in dals perscrutaders che s'occupa tar Agroscope da las apricosas. «Ussa cumenzain nus er da descriver ellas tenor la resistenza ch'ellas han cunter la chalira, la setgira u er ferma plievgia, perquai che nus avain qua er ferma plievgia la stad.»
Ventg novas sorts
La finamira da la branscha saja dad uschia chattar las meglras sorts per il Vallais e da far popularas quellas tar ils purs indigens, di Olivier Borgeat da la federaziun vallesana dals producents da legums e fritgs. «Nus stuain sa concentrar sin relativ paucas sorts che persvadan e plaschan. Sche nus avain radund ventg sorts fiss quai in dumber ideal.»
Spetgà buna racolta 2022
Malgrà tut las sfidas futuras, la racolta actuala para en tutta cas dad esser buna. La branscha spetga da pudair racoltar enturn 9'000 tonnas apricosas vallesanas. Avunda per mitigiar in zic las sperditas da l’onn passà pervia da la schelira.