La chasa da spierts sa zoppa en las giassas da la citad veglia da Berna. Sch’ins na sa betg precis nua che la chasa è, lura na s’accorsch'ins gnanc che quai è ina chasa da spierts. La chasa en la Junkerngasse 54 vesa ora da dadora sco tut tschellas chasas en la giassa. Dentant endadens è ella tut auter.
Per mai n'ha quella chasa da far nagut cun spierts.
Be ina chombra ha la chasa. Quai saja era il motiv, daco che mai nagin haja vivì en la chasa, di Monica Bilfinger dal departament d'edifizis e logistica da la Confederaziun. La chasa n'haja era betg access a la chanalisaziun, di ella vinavant.
Or dal nagut
Monica Bilfinger è fitg sceptica, tge che pertutga las istorgias da spierts che vegnan quintadas. Las istorgias vegnian simplamain mo quintadas da la glieud.
La chasa era adina vida, quai vegn ad esser il motiv daco ch'ins ha emplenì ella cun istorgias.
Nagina da quellas istorgias na saja confermada. Mo ina saja vegnida scritta en in cudesch. I sa tratta da l’istorgia da trais students: Els hajan tschertgà in suttetg per ina notg, hajan chattà la chasa, sajan i a durmir ma na sajan mai pli svegliads – morts erani!
Istorgias senza fin
La notg sgriztga e cloma la chasa ed ils barcuns da las fanestras s'avran e mintgatant dattani giu per terra. La glieud da Berna raquinta d'ina dunna ch'è vestgida tut en nair e cura ch'ella passa sper ins via bad'ins in vent fraid e survegn pel-giaglina. Ed auters vesan ina dunna senza chau che guarda or da fanestra, cura ch'igl è stgir e cumenza a rir nausch e dad aut.
... quai ch'ins sa
La chasa che vegn numnada «Gspensterhaus» è vegnida fabritgada enturn il 1405, suenter che la citad da Berna era arsa. La chasa saja vegnida duvrada sco tschaler u sco stalla per la chasa vis a vis. Quai è la chasa von Wattenwyl che tutgava a la claustra dad Interlaken. La chasa da spierts è vegnida regalada a la Confederaziun. Quella ed era la chasa von Wattenwyl tutgan anc oz a la Confederaziun.
RR actualitad 12:00