Igl è curt avant las diesch la saira, cura che Renato Häusler, il guitader da la catedrala da Losanna, va da la stgala clutger siadora, enfin ch’el arriva sin l’emprima auzada da la catedrala, là nua ch’ils zains èn fermads. Da qua han ins ina bellezza vista sur Losanna ed il lai. Tut è quiet. Pli quiet che uschiglio.
Ins sentia ch’insatge saja auter, di Häusler, ch’è dapi 18 onns il «guet» da la catedrala da Losanna, sco quai ch’il guitader ha num per franzos.
Ins senta ch’igl ha pli pauc traffic, nagin per las vias. Bunamain il ruaus perfetg.
Il coronavirus e las admoniziuns da restar a chasa hajan gronda influenza. I saja in zic sco in mantè da quietezza sur la citad, di Häusler.
El sto però far vinavant. El ha anc da far. El metta si ses chapè nair, prenda sia laterna ed annunzia las uras, sco quai ch’i è tradiziun. Ma enstagl da turnar enavos en sia stanza e da spetgar ch’i vegnia las indesch, va el vi tar in da quels zains e cumenza a far ir il battagl. L’emprim trais fridas, ina pausa e lura sis fridas. Quai durant trais minutas.
La sequenza dals tuns sco era il zain han ina lunga tradiziun. Il zain cul num «La Clémence» datescha dal 16avel tschientaner e vegniva tutgà per alarmar la populaziun da Losanna da brischaments e catastrofas. La sequenza da tuns è perfin anc in tschientaner pli veglia.
Appel a la solidaritad
E dapi la fin da mars tuna quai puspè mintga notg giu dal clutger da la catedrala da Losanna. Il messadi saja ussa dentant in auter, di Renato Häusler.
Igl è in messadi da solidaritad. Nus essan tuts pertutgads da quai che schabegia sin il mund il mument. Igl è sco in brischament sin l’entir mund, e d'avertir da lez maina nus puspè enavos tar la funcziun originala dal zain, era sche la raschun n’è betg pli la medema.
E tutgar il zain vegni el anc in mument, di il «guet» da la catedrala da Losanna. Mintga saira a las diesch, per far endament quant impurtanta che la solidaritad è tranter ils umans.