Siglir tar il cuntegn

Header

audio
HelveCHia: Plazza aviatica ad Agno en il Tessin
Or da Actualitad dals 04.11.2021.
laschar ir. Durada: 3 minutas 31 Secundas.
cuntegn

Eroport Lugano-Agno Dus projects en fasa finala

L’entschatta eran quai anc siat, ussa èn anc dus projects ella concurrenza. Omadus vulan manar l’eroport da Lugano-Agno en in nov futur, dentant mintgamai cun in auter focus.

L’entschatta eran quai anc siat, ussa èn anc dus projects ella concurrenza. Omadus vulan manar l’eroport da Lugano-Agno en in nov futur, dentant mintgamai cun in auter focus.

D’ina vart ils uschenumnads ‘Amis da l’eroport’. Davos quai consorzi stattan tenor infurmaziuns da diversas medias localas ils multimilliunaris Lindsay Owen-Jones, anteriur CEO dal concern da cosmetica l’Oréal, ed Andrea Bonomi, schef da l’interpresa d’investiziun Investindustrial. Omadus vivan el Tessin.

Jets pitschens per Genevra e Berna

Lur project prevesa da spustar il terminal e da bajegiar novs hangars. Plinavant duai dar novas colliaziuns da sgol regularas tranter Lugano e Genevra e Lugano e Berna. Responsabla per il  manaschi da sgol duai esser l'interpresa Lux Aviation che vul duvrar per quai aviuns pitschens che porschan plazza a maximal 10 passagiers.

Tiziano Ponti è commember da la gruppa da lavur da la citad da Lugano per l’eroport ed ha prendì sut la marella las duas propostas. Il project dals ‘Amis da l’eroport’ valitescha el sco realisabel.

“Quai è in project fitg concret che po vegnir realisads en curt temp. Da menziunar è era la soliditad finanziala dal project.”

Fotovoltica e dronas

Il segund project, quel dal 'Consorzi Lugano-Airport' metta il focus dapli sin las immobiglias e novas tecnologias. Sper in hangar nov ed in autosilo cun 500 parcadis vulan ils iniziants era investir en ina gronda ovra fotovoltaica e stgaffir sin l’areal in center per la tecnologia da dronas. Gist quai spiert innovativ vesa Tiziano Ponti sco grond avantatg da quella proposta.

“Era qua è la realisabladad in punct ferm sco era las fasas da realisaziun. L’idea d’avrir l’eroport a novas tecnologias, era sche quai punct sto anc vegnir approfundà, ed l’uschenumnada impronta verda cun l’idea dals panels solars.”

Anc betg sviluppads a la fin

Ad omadus project manca dentant ina chaussa fitg impurtanta. Per che l’eroport possia era il futur vegnir duvrads a moda effizienta e sco plattafurma da mobilitad per aviuns pli gronds sto il sistem electronic d'avischinaziun vegnir modernisads. La gruppa da lavur da la citad da Lugano ha els documents da concurrenza numnà quai punct sco in dals pli impurtants. Mo ton il project dals 'Amis' sco quel dal 'Consorzi' èn en quella dumonda anc pauc concrets. Quai vegni segir anc a dar intginas discussiuns è Tiziano Ponti persvas.

“Ils dus projects han cuntanschì il nivel minimal che la citad ha definì ed ussa èsi impurtant da perfecziunar ils projects per che la citad po decider tge project ch’è il meglier.”

E quai sa anc ir in mument. Tiziano Ponti na leva betg numnar in datum, expertas ed experts quintan dentant ch'i possia schon anc ir tschintg enfin set onns enfin la realisaziun dad in dals dus projects ussa sin maisa dals responsabels da la citad da Lugano.  

Artitgels legids il pli savens