Klaus Lorenz ha gia dapi bunamain 1/4 tschientaner adina puspè da far cun interpresas chinaisas. L’um els 50 ha era lavurà en China. Actual è el directur da la Heberlein SA, ina interpresa cun circa 80 emploiai e sedia a Wattwil (SG). Tenor atgnas indicaziuns è l'interpresa il numer in sin la fiera da tiblas per la valurisaziun da fils e tailas. E dapi il 2013 tutga la Heberlein SA al concern chinais Jinsheng.
El chapeschi ch’i dettia persunas ch'hajan in curius sentiment sch'els audan ch'ina interpresa svizra mida en mauns d'investurs chinais. Mo ils temps sajan sa midads e cun quai era la moda e maniera co ils Chinais fetschian fatschentas. Avant 15 ni 20 onns saja quai vairamain stà uschia ch'interpresas chinaisas han cumprà ed alura demontà l'entira interpresa per bajegiar si ella en China. El haja sez vesì tals cas en Germania, ma quai na saja oz betg pli uschia, ha ditg Lorenz.
Per ils investurs saja il «Swiss Made» e la qualitad dals products svizzers da grond’impurtanza. E quella qualitad ed la marca veglian ils investurs salvar, di Lorenz. «Noss products vegnan vendids era en China sco Premium. In investur na vegn mai a dischlocar l’interpresa en China perquai ch’el perdess uschia quai Premium.»
Perquai na saja era betg uschia che la Heberlein SA saja vegnida transfurmada en ina interpresa chinaisa. La direcziun saja anc adina en mauns da managers europeics ch’enconuschian la cultura indigena. I na dettia perquai oz era betg ina tala gronda differenza tranter las culturas da fatschenta sco quai ch’ins haja adina l’impressiun, di Lorenz. Sia interpresa haja anc adina in'identitad Svizra. Ed al retschaviment dettia era nagins simbols chinais ni figurinas da giats che smainan la toppa per carmalar viaden il cletg. La tenuta saja: «Ti ès Heberlein e ti has in’atgna identitad e quella vulain nus mantegnair.»
Da l'autra vart dettia era clers avantatgs d'avair in possessur chinais, declera Klaus Lorenz. Qua tras hajan els in access al martgà chinais, in martgà che creschia fitg. Sco en blers auters pajais protegi era la China sia fiera da la concurrenza da l’exteriur. Sco interpresa svizra en possess chinais hajan els qua gronds avantatgs. «Mes partenaris en China san exact tge che las autoritads vulan e tge ch’ellas pretendan. Sco Svizzer na sappian ins betg giuditgar quai.» E quai levgeschia ina massa. El miri perquai era cun confidenza el futur, ha ditg Lorenz. En trais onns veglian els ir cun la Heberlein SA a la bursa chinaisa e lura crescher cuntinuadamain.
RR actualitad 12:00