Siglir tar il cuntegn

Header

audio
HelveCHia – ils chastels da Bellinzona en nov vestgì
Or da Actualitad dals 15.04.2021.
laschar ir. Durada: 3 minutas 12 Secundas.
cuntegn

«Fortezza Bellinzona» Bellinzona lascha splendurar ses chastels

In logo, novas exposiziuns ed in’illuminaziun moderna duain carmalar ils turists.

Castelgrande, Montebello e Sasso Corbaro, uschia han num ils trais chastels da Bellinzona. In pau lung e cumplitgà per far reclama e carmalar ella chapitala tessinaisa las famiglias ed ils turists. Quai ha era Rossana Martini pensà, la responsabla per cultura ed eveniments da la citad. Perquai duai tut ussa avair num «Fortezza Bellinzona». In num che fetschia tuttavia senn, declera ella.

Ils chastels èn part dal patrimoni cultural mundial da l'UNESCO perquai ch'els furman in'unitad. Ils trais chastels ensemen cun il mir da protecziun.
Autur: Rossana Martini Responsabla cultura ed eveniments citad da Bellinzona

E cun il nov logo che mussa trais dents che represchentan ils trais chastels sper in toc dal mir da protecziun cumbinà cun il text «Fortezza Bellinzona» duai quella unitad vegnir mussada.

La nova cumparsa grafica n’è dentant betg la suletta midada ch'i dat ord vista turistica a Bellinzona. Dacurt ha il parlament da la citad era decidì da renovar l’entir indriz d'illuminaziun dals chastels ch'è ussa 30 onns vegl e mo pli per part en funcziun. La nov'illuminaziun che custa da quai dad 1,3 milliuns francs duai esser pli clera e render pli spectaculara la vista nocturna. Il medem mument duai ella dentant era esser drizzada uschia che la polluziun dal tschiel nocturn tras la glisch vegn reducida. Per l’emprima giada splendurar en nova glisch duai la fortezza da Bellinzona la fin da l’onn che vegn.

Scuvrir l'ovra da Raffaello

Carmalar ils turist a Bellinzona e sin ils chastels duain dentant era las exposiziuns. Suenter il grond success da l'exposiziun davart Leonardo da Vinci l'onn passà, ha avert quels dis ina retrospectiva sin l’ovra dal pictur Raffaello. L'exposiziun en il Castello di Sasso Corbaro mussa las ovras da l’artist da la renaschientscha cun agid da projecziuns e realitad augmentada e declera l'influenza che l'epoca da la renaschientscha ha sin la vita quotidiana.

Modernisada è era l'exposiziun permanenta en il chastè Montebello che tracta tranter auter l’istorgia dals chastels da Bellinzona. Nov pon las visitadras ed ils visitaders chargiar in'app sin lur telefonin che enritgescha l'exposiziun cun videos e commentaris, declera Moira Morinini da l’Uffizi chantunal per ils bains culturals.

La guida pussibilitescha d’approfundar quels temas e da colliar ils chats exponids cun quai ch'il servetsch archeologic chatta bunamain mintga di sin l’areal.
Autur: Moira Morinini Uffizi chantunal per ils bains culturals

Quai n’è dentant anc betg tut. En il decurs dals proxims trais enfin quatter onns vul la citad da Bellinzona ensemen cun il chantun Tessin investir ulteriurs 14 milliuns francs en ina segunda etappa. En il focus lura l'inscenaziun ed il marketing per la «Fortezza Bellinzona».

RTR actualitad 12:00

Artitgels legids il pli savens