Las cifras tunan dramatic. Mo pli da quai da 600 enfin 700 expositurs duain preschentar lur uras e bischutaria a la Basel World primavaira proxima. Cumpareglià cun quest onn èn quai mo pli la mesadad.
Il dumber d'expositurs reflecteschia la situaziun actuala da la branscha, di Christian Jecker, il pledader da la Messe Schweiz SA ch'organisescha l'exposiziun. El identifitgeschia duas raschuns per la crisa. D'ina vart saja la svieuta dals producents dad uras e bischutaria ida enavos marcant. E da l'autra vart saja era quella branscha confruntada cun la digitalisaziun ed il fatg, ch'adina dapli bischutaria vegn vendida via internet.
Expositurs crititgeschan pretschs auts
Ch'ils temps sajan oz pli dirs conferma era Patrik-Philipp Huber dal producent d'uras Zeno-Watch da Basilea. La raschun pertge ch'adina dapli marcas, per exempel Hermes ni Dior, na vegnan betg pli a la Basel World vesa el dentant en emprima lingia tar la direcziun da l'exposiziun.
Dapi l'avertura da las novas hallas avant quatter onns saja la Basel World anc ina giada vegnida massiv pli chara. Il medem mument sajan las delegaziuns da cumpraders vegnidas adina pli pitschnas. La forsch giaja uschia pli e pli fitg dapart. L'exposiziun custia adina dapli mo portia la fin finala adina pli pauc, di Huber.
Mo pli sis enstagl otg dis
Jecker sa dusta. Las tariffas per la locuziun sajan vegnidas decididas ensemen cun l'uniun dals expositurs. Ultra da quai vegnian ils pretschs reducids l'auter onn per 10%. Sper la reducziun dal tschains da locuziun ha la direcziun era anc decidì autras mesiras. Uschia vegn la surfatscha da l'exposiziun reducida per in terz. Ultra da quai dura la Basel World l'auter onn mo pli sis enstagl da otg dis. Quai gidia da sbassar ils cust dals expositurs e vegnia era sustegnì da quels.
Direcziun sut squitsch
Ch'i dovria ina nova strategia ed era in’autra furma da collavuraziun tranter la Basel World ed ils expositurs crai era Patrik-Philipp Huber. El na tutgia betg tar quels che na vesian nagin futur pli per l'exposiziun, mo i dovria ussa definitivamain dapli che mo retuschas. I dovria ina nova direcziun per l’exposiziun. Uschiglio na vesia el nagin bun futur per l’exposiziun.
Chatta la Basel World pia ina via per restar era en il futur la pli impurtanta e gronda exposiziun dad uras e bischutaria dal mund? L'exposiziun la fin da mars 2018 pudess signar ses destin.
RR actualitad 12:00