Ch’il festival dal film da Locarno po festegiar quest onn sia 70avla ediziun è d’engraziar ad ina pitschna gruppa d’amis dal film. Malgrà che la populaziun aveva en ina votaziun il 1946 ditg na ad in festival da film han els betg cedì ed han prendì sez enta maun la chaussa. Ils 26 d’avust dal medem onn ha lura gì lieu l’emprima ediziun dal «Festival internazionale del film». Quai sin il parc dal Grand Hotel Locarno. Sco emprim film è vegnì mussà «O Sole Mio», in film da spiunascha talian dal reschissur Giacomo Gentilomo.
Success e crisas
Dapi lura ha il festival adina puspè passentà temps interessants mo era turbulents. Ils onns 50 e 60 ha el profità da la popularitad dal film europeic, cunzunt dal film talian cun ils gronds reschissurs Fellini, Visconti u era Antonioni. Ils protests da l’onn 1968 han era laschà lur fastizs a Locarno. La direcziun dal festival leva prender si quest moviment ed ha midà concept. Betg mo film mabain era discussiun e debatta duevan avair plaz. La consequenza: Tumults e protestas e pervia da reducziuns da subvenziuns era in’emprima crisa.
-
Bild 1 von 11. L'emprima ediziun dal festival ha gì lieu il 1946 en il curtgin dal Grand-Hotel Locarno. Bildquelle: Locarno Festival.
-
Bild 2 von 11. Projecziun dad in film en il curtgin dal Grand-Hotel Locarno il 1946. Bildquelle: Locarno Festival.
-
Bild 3 von 11. Dapi il 1971 è la Piazza Grande in dals simbols dal Festival da Locarno. Bildquelle: Locarno Festival.
-
Bild 4 von 11. La saira sa transfurmescha la Piazza Grande en in kino al liber cun 8'000 aspectaturs. Bildquelle: Locarno Festival.
-
Bild 5 von 11. Era quai tutga tar il festival dal film da Locarno. La plievgia na spuenta betg ils aspectaturs da la Piazza Grande. Bildquelle: Keystone.
-
Bild 6 von 11. Il premi principal dal festival - il pardo d'oro. Bildquelle: Keystone.
-
Bild 7 von 11. El ha manà Locarno en la prima ligia dals festivals da film. Dapi l'onn 2000 dirigia Marco Solari sco president il destin dal festival. Bildquelle: Keystone.
-
Bild 8 von 11. El decida tge films che vegnan mussads. Dapi il 2012 è Carlo Chatrian il directur artistic dal festival. Bildquelle: Locarno Festival / Marco Abram.
-
Bild 9 von 11. Il lieu per guardar las interessantas retrospectivas dal festival. Il kino ExRex avant la renovaziun, cun las sutgas alvas, ... Bildquelle: Locarno Festival.
-
Bild 10 von 11. ... ed oz sco Gran Rex cun sutgas cotschnas. Bildquelle: Locarno Festival.
-
Bild 11 von 11. Il PalaCinema - 33 milliuns francs ha custà il nov center d'administraziun dal festival. Bildquelle: Keystone.
Dapi il 1971 è la Piazza Grande il center dal festival dal film. Durant las sairas giaudan qua fin a 8'000 persunas l’atmosfera unica ed ils films che vegnan projectads sin la pli gronda taila da l’Europa.
PalaCinema e Gran Rex
Per l’ediziun da giubileum ha il festival fatg a sa sez regals. Uschia è vegnì renovà il vegl kino Rex, bajegià il 1966, che sa chatta en ina giassa laterala da la Piazza Grande. Las sutgas alvas èn vegnidas remplazzadas cun bellas sutgas cotschnas, la tecnica da projecziun e da tun è ussa sin il novissim stan.
E betg d’emblidar il Palacinema (Palazzo del Cinema), il nov center da l’administraziun dal festival. Or da l’anteriura scola ha l’architect spagnol Alejandro Zaera-Polo realisà in bajetg multifuncziunal. Sper ils biros dal festival e da la Cinémathèque Suisse engrondeschan trais kinos ed in’ustaria la purschida. Sin tetg è da vesair in’installaziun cun millis da bandieras dad aur che sa movan en il vent e fan endament il simbol dal festival – il muster dal pail dad in leopard.