Siglir tar il cuntegn

Header

audio
HelveCHia: Plantas da maruns pateschan da sitgira
Or da Total local dals 22.08.2022.
laschar ir. Durada: 2 minutas 37 Secundas.
cuntegn

HelveCHia Las plantas dal Mendrisiotto pateschan da la setgira

I tut scruschigna sch’ins spassegia tras ils guauds dal Mendrisiotto. Feglia setga schai giun plaun, gist sco l’atun, e quai mez avust cura che las plantas stuessan anc purtar lur feglia verda.

Dretg e sanester da la senda il medem maletg. Plantas setgas, nua che la feglia penda per part anc vid la roma. Per Patrick Luraschi, il primselvicultur da la regiun, ina trista chaussa.

Nus essan bunamain trais mais memia baud vidlonder.
Autur: Patrick Luraschi Primselvicultur

Trais mais memia baud muntia che la perioda da vegetaziun ha cuzzà circa la mesadad dal temp normal. Quai haja consequenzas difficilas per l’entir ciclus da reproducziun da la planta.

Patrick Liraschi, il primselvicultur da la regiun
Legenda: Patrick Liraschi, il primselvicultur da la regiun RSI

Tut ils scherms novs ch'èn creschì ord ils sems questa primavaira n’hajan gì nagina schanza da sa sviluppar sin il terren sitg, senz'aua. Quai muntia nagut auter ch'in onn pers per la regeneraziun dal guaud. E probabel na vegnia l’onn proxim betg ad esser auter, tema Patrick Luraschi. L'entira situaziun fa ad els gronds quitads.

Normalmain datti qua el Mendrisiotto el decurs dals emprims siat mais da l’onn circa 1000 mm aua, quest onn èn quai stads mo da quai da 240 mm, pia 3/4 pli pauc.
Autur: Patrick Luraschi Primselvicultur

Ed lura sajan anc las temperaturas bler pli autas vegnidas vitiers. Per tschertas plantas saja quai ina maschaida mortala.

Sper ils maruners pateschan era ils faus da la setgira. Perditga da quai èn las plauncas brinas. Ed betg d'emblidar il privel da fieu. Tut quella feglia setga giun plaun ed per part era vid las plantas paran da mo spetgar da pigliar fieu. I dovra perquai urgentamain plievgia, betg mo in, dus dis, mabain almain in'entira emna, di Patrick Luraschi.

Nus na savain anc betg tge che schabegia proxima primavaira. Probabel vegnan intginas plantas a sa revegnir, autras vegnan a murir.
Autur: Patrick Luraschi Primselvicultur

Quai saja bain il decurs da la vita. Mo el agiunta ch’in guaud en ina tala situaziun desolata, quai saja l’emprima giada ch’el haja vis insatge uschia.

Artitgels legids il pli savens

Scrollar a sanestra Scrollar a dretga