Tar la cursa cun dronas sa tracti d’in sport nua ch’ins maina ina drona pitschna via telecumond tras in percurs plain obstachels. Ils pilots da las dronas ston sgular tras tunnels, sur e sut stangas ora u era far slalom enturn pitgas. Il dissegnader da questas pistas è Marc Heiniger dal chantun Berna.
Resguardar bleras chaussas
En la «Swiss Drone League» è Heiniger responsabel per la creativitad e realisaziun da las pistas. L’um che lavura principalmain sco dissegnader da maschinas sto mirar sin pliras chaussas durant planisar ina pista. Tranter auter èsi impurtant da far pistas che n’èn betg memia grevas per ils pilots, per che las dronas na crodian betg en l’emprima storta. Vinavant èsi era da plazzar las reclamas dals sponsurs sin la pista per che quellas sajan bain visiblas per las cameras. La pli gronda prioritad è la segirtad dals aspectaturs. Cunquai che las dronas sgolan cun 100 km/h sto el installar saivs per proteger ils aspectaturs da las dronas.
Professiun da siemi?
Marc Heiniger è stà in dals emprims che ha fatg part da questa scena avant 4 onns. Tras sia experientscha è el ruschnà avant in onn en questa funcziun. El fetschia gugent questa lavur schegea ch’i prendia ad el bler temp liber. En il mument n’èsi betg ina opziun da far quai sco lavur principala. Sper la stagiun da cursas na dettia numnadamain anc betg avunda lavur per savair viver da quest mastergn.
RTR HelveCHia 12:00