HelveCHia - Nivels rosa a Basilea

En las medias socialas curseschan las ultimas emnas adina puspè fotos che mussan in tschiel rosa a Basilea. Per part è vegni speculà ch’i sa tractia da glischs polaras u da reflecziuns dad in brischament. En realitad è la raschun dentant stada main spectaculara. La glisch vegn da lampas en il stadion da ballape da Basilea, il Joggeli.

Lampas che imiteschan la glisch dal sulegl e duain gidar il tschispet da crescher bain. E quai gist durant ils mais d’enviern durant ils quals ils dis èn pli curts. E sche ils nivels èn lura anc pulit bass, reflectescha la glisch da quellas lampas vid quellas, e quai uschè fitg che perfin dus vischins dal stadion èn sa fatg quitads. Quai conferma Matthias Nabholz da l'Uffizi d'ambient e d'energia da la citad da Basilea ch’è responsabels per las reclamaziuns da glisch. «Ina persuna ha gì quità pervia da las plantas e che la glisch artifiziala pudess disturbar la creschientscha natirala da quellas. E tschella persuna ha gì quità pervia dals animals selvadis ed era en general che la glisch disturba.»

Giuridicamain en urden

Per l’uffizi n’è quai betg nov. Gia l’onn avant sajan els stads en contact cun il club da ballape da Basilea, il FCB, pervia da quella illuminaziun dal tschiel. Mo perquai che tut saja ord vista giuridica en urden, na vesian els nagin basegn d’agir. «Nus guardain che nus pudain minimar questa polluziun da glisch. Ina basa legala na datti praticamain nagina, i na dovra era betg ina permissiun da bajegiar per duvrar in tal indriz. La suletta pussaivladad è da guardar da limitar effects nungiavischads.»

Limitar, quai na saja dentant gnanc uschè simpel, di Remo Meister, il pledader da medias dal FCB. Las lampas dovrian els per regenerar il tschispet suenter ils gieus. Mo uschia possian els garantir in tschispet saun e resistent, quai cunzunt durant l’atun e l’enviern. Cuvrir las lampas uschia che nagut na illumineschia il tschiel sur il stadion na saja betg pussaivel en il Joggeli. «L’FCB na vul segir disturbar nagin cun quellas reflecziuns. Da curclar las lampas a moda effectiva n’è dentant betg pussaivel. Per quai stuess ins prest serrar il tetg dal stadion, quai che n’è betg pussaivel en il Joggeli.»

FCB instradescha mesiras

Els vegnian dentant ad instradar mesiras per che uschè pauca glisch sco pussaivel bandunia il stadion. Folias per cuvrir che pudessan reflectar svaneschian e las lampas glischian mo enfin la saira a las diesch. L’FC Basilea e ses stadion vegnan pia era a crear notgs magicas il futur, betg mo durant ils gieus mabain mintgatant era la saira sur il stadion.

Vairas glischs polaras sur il Grischun