Siglir tar il cuntegn
cuntegn

helveCHia Investur chinais procura per tema tar ils purs da latg da Friburg

A Saint-Aubin en il chantun Friburg vul il concern chinais Synutra bajegiar ina fabrica per la producziun da nutriment da pops. Ils purs da la regiun èn alarmads.

Visualisaziun da la fabrica che Synutra vul bajegiar a Saint-Aubin en il chantun Friburg.
Legenda: In'emprima visualisaziun da la fabrica che Synutra vul bajegiar a Saint-Aubin en il chantun Friburg. MAD

Il project è giagliards. Plirs tschients milliuns francs vul il producent chinais da nutriment per pops Synutra investir en Svizra, concret en il vitg Saint-Aubin en il chantun Friburg. La fabrica duai elavurar la scotga da las chascharias da la regiun, producir ordlonder ina pulvra che duai lura vegnir exportada sco nutriment per pops en lla China.

Qualitad svizra è dumandada

I na saja betg casualitad, ch'ils Chinais hajan decidì d'investir gist en quella regiun, di Vincent Stucky, il schef da Translait, ch'è il partenari svizzer dals Chinais. Bain sappia Synutra che la producziun en Svizra saja pli chara ch'els pajais vischins. Els hajan dentant era ina segirtad quai che pertutgia la qualitad ed els enconuschian ils products svizzers. «Els enconuschan era la politica svizra che vegn a garantir a lunga vista la producziun da chaschiel ed uschia la scotga per curclar ils basegns da la fabrica.»

L'expansiun en Svizra ha era da far cun ina retscha da scandals ch'i ha dà ils ultims onns en China pervi da pulvra da latg contaminada. Perquai ch'els na fidan betg pli als products indigens, cumpran blers geniturs mo pli products da l’exteriur. Cun la fabrica svizra vul Synutra, il terz grond producent chinais da nutriment per pops, puspè gudagnar enavos la confidenza dals consuments.

Tema per il pretsch da latg

Ina confidenza che manca tar ils purs da la regiun. Els na sajan betg da principi cunter la fabrica nova, di Gabriel Yerly, il president da la federaziun dals producents da latg dal chantun Friburg. El na veglia betg, ch'ins stoppia lura dir en intgins onns, ch'i fiss stà meglier da betg laschar construir quella fabrica. «Quai è la raschun, pertge ch'ils purs da latg sa sentan obligads da far attent sin ils privels. Cler fissi flot d’avair investiziuns da 200 milliuns francs e da quai da 100 plazzas da lavur novas. Ma quai na dastga betg periclitar l'entira industria da latg en Svizra.»

El dubita che la producziun funcziuneschia mo cun la scotga. Baud ni tard vegnia midà sin pulvra da latg. E quai vegnia lura ad avair consequenzas per ils ulteriurs elavuraturs da latg da la regiun e sin il pretsch dal latg, tema Yerly. Gia oz saja il martgà saturà. Sper la Mirgos, la Nestlé e la Milco elavuria era l’interpraisa Cremo, che tutga per gronda part als purs da latg da Friburg, il latg da la regiun. En il chantun Friburg ed en la Svizra franzosa sa regordian ins anc fitg bain dal concurs da la Swiss Dairy Food il 2002. Il concern era memia flaivel ed i deva memia bleras interpresas che elavuravan il latg. «Sch'i dat ussa anc in nov producent è la ristga gronda ch'igl ha puspè memia blers.»

Situaziun Win-Win

Gist quai na saja gea betg il cas, di Vincent Stucky. La fabrica vegnia construida unicamain cun l'intent d'elavurar scotga. Plinavant possedia la Translait gia oz uschè blers contracts cun chascharias, che la quantitad da scotga che vegnia duvrada per la producziun saja garantida. E quels contracts sajan la fin finala era en l'interess dals purs da latg, di Stucky. Sche la chascharia possia vender sia scotga ad els, na chaschunia quai era nagins custs supplementars che pudessan avair in effect negativ sin il pretsch da latg. «Pia tut quai ch'ins sa optimar en la chadaina da producziun, duess era avair in effect positiv per ils producents da latg.»

Anc na datti dentant betg glisch verda per la construcziun da la fabrica. L’ultim pled ha la regenza dal chantun Friburg. Il chantun posseda numnadamain il terren, sin il qual la fabrica nova duess vegnir construida.

RR actualitad 08:00