En ina butia sa zuppa dapli tecnica ni software che quai ch’ins spetga. La software na dat betg en egl, perquai ch’ins na vesa betg ella, di Pascal Hagedorn da la SAP che sviluppa software per butias. El ha ina butia da test u meglier ditg in labor, nua ch'el sviluppa software. Il labor guarda ora sin l’emprima egliada sco ina pitschna butia. Sin la segunda egliada sent'ins però svelt ch'i dat qua bler dapli computers ed apparats ch'en ina butia usitada.
In viadi fictiv tras la butia dal futur
En il labor testa Pascal Hagedorn, co la butia dal futur pudess guardar ora. Ina finamira è ch'il cumprar en duai vegnir in eveniment per ils clients. Qua intgins exempels:
Reclama persunalisada
Cun entrar en butia registrescha ina camera tgi ch'entra. Vul dir, la vegliadetgna vegn evaluada e la camera registrescha era sch’ins è in um ubain ina dunna. Cun quellas infurmaziuns èsi pussaivel da mussar – sin moniturs ch’èn sparpagliads en butia – reclama persunalisada. Las butias pon uschia evaluar, tge clientella ch'ella ha e cura che tgi vegn a cumprar en.
Curunas automatisadas
Cun arrivar tar l’emprim regal cun si per exempel vestgadira, n'han ins betg da guardar tras ils regals, mabain ins ha in catalog digital che mussa tge che sa zuppa en ils regals. E sch'in regal è vid, survegnan ils vendiders automaticamain in signal dal regal ch'i saja dad emplenir suenter. Quai è tranter auter pussaivel pervi da las tavlas da pretschs digitalas. Ils pretschs pon las butias uschia era adattar mintga mument.
Plitost per mangiativas saja quai ina schanza, di Pascal Hagedorn. Per exempel per fritga po il pretsch vegnir adattà tenor frestgezza. L’emprim di pajan ins il pretsch plain e pli ditg che la fritga è sin il regal, pli bunmartgà vegn ella.
«Spievel – spievel vid la paraid»
In spievel che sa discurrer n'ha betg sulet la nauscha regina en la parabla dad Alvetta. Butias da vestgadira pudessan avair da quels en l'avegnir.
La vestgadira duai survegnir in'identificaziun singulara, in uscheditg code RIFD. Uschia vegn mintga toc unic. Sch’ins prenda lura per exempel ina chamischa blaua en grondezza M e va en la cabina, sche lura sa la cabina precis tge ch’ins vul empruvar en. Vul dir il spievel ed en il medem mument era in monitur. Quel mussa per exempel en tge autras grondezzas e colurs ch'i dat la chamischa, ed era tge accessoris che fissan bels vitiers. E sch'i na dat betg pli la gista grondezza da la chamischa, sche lura pon ins subit empustar quella cun in pèr clics sin il spievel e laschar trametter direct a chasa.
Nua e tgi
Cameras ch'èn plazzadas en tut la butia registreschan, nua che las pli bleras persunas sa chattan en butia. Las cameras tramettan in signal als vendiders e quels san nua ch'i dovra anc persunal en butia. Uschè po era vegnir evaluà tge part da la butia che renda il pli fitg.
Ma tut quai na fiss betg pussaivel senza nossas datas.
Tecnicamain è bler dapli pussaivel che quai che las butias dovran oz.
I vul nossas datas
Quella tecnologia è mo pussaivla cun ramassar nossas datas. Cun savair sche dapli umens u dunnas, dapli giuvens etc. vegnan, pon las butias analisar nossas disas da cumprar en. La tecnologia fiss uschè enavant che las butias pudessan identifitgar mintgin sco individi. Quai tras cartas da clients, ni tras apps che ramassan nossas datas.
Per l’ina pon ins porscher in meglier servetsch als clients en butia sch’ins evaluescha las datas ramassadas. Per l’autra vegnan lura apunta ramassadas diversas datas dals clients…
Ins pudess uschia era malduvrar las tavlas digitalas. I fiss pussaivel d'adattar il pretsch da consument a consument. Pascal Hagedorn dubita dentant che las butias fetschian quai, perquai ch'ellas pudessan perder lur num ed uschia era clients.
Pascal Hagedorn accentuescha in pèr giadas: Els pon metter a disposiziun la software, ma tge che las butias fan cun quella è surlaschà ad ellas.
RR actualitad 12:00