Siglir tar il cuntegn

Header

Navigaziun

Auto da la Furmla E charrescha tras la citad veglia da Berna.
Legenda: Suenter Turitg l'onn passà vegnan ils autos da la Furmla E a charrar ils 22 da zercladur a Berna. Keystone
cuntegn

helveCHia La Furmla E na frunta a Berna betg mo sin simpatia

Entant ch'ils organisaturs spetgan 100'000 aspectaturs per la cursa la fin da zercladur, vesa la sanestra en l'eveniment in faus signal en il temp da la crisa da clima.

Pretensius e spectacular. Quai èn ils chavazzins che vegnan endament sch'i va per la cursa da Furmla E che ha lieu ils 22 da zercladur a Berna. Pretensius è il cirquit. Quel na maina bain betg tras la citad veglia da la chapitala, n’era betg sper la Chasa federala vi. Persuenter ston ils autos ipermoderns charrar dal Bärengraben siadora tar il Rosengarten e da là puspè giuadora. Ina pulita differenza d'autezza che vegn a pretender bler da pilot ed auto.

Buna reclama per Berna

Spectacular saja natiralmain la culissa, di il cusseglier communal da Berna, Reto Nause.

Ins vegn a vesair la citad veglia da Berna che tutga tar il patrimoni cultural mundial da l'UNESCO, ensemen cun l’Aare ed il Rosengarten. Quai èn segir bels maletgs.
Autur: Reto Nausecusseglier communal da Berna

Insumma nagin plaschair da l’eveniment amez la citad ha percunter Franziska Grossenbacher da la partida verda da Berna. Tenor ella possian ins far ina tala cursa sin in eroport ni era sin il percurs istoric tras il guaud da Bremgarten.

En ina regiun abitada, en in quartier d’abitar n'ha uschè in percurs per nus segir nagin plaz.
Autur: Franziska Grossenbacherpoliticra da la verda da Berna

Fauss signal per la protecziun dal clima

Ensemen cun autras partidas sanestras ha ella rimnà 1’700 suttascripziuns per protestar cunter la cursa. Quai che disturba cunzunt ella è ch'i vegni vendia tut sut l’etichetta da l'ecologia e da la protecziun da la natira e dal clima. Qua vegnia la glieud cugliunada.

Tar quellas cursas da Furmla E vegnan quels autos sgulads tras il mez mund. Cler è il motor electrics, quai è segir meglier. Ma era qua vegn l’energia simplamain sfarlattada. Talas cursas cun autos na tutgan per nus era betg en noss temp, il temps da la protecziun dal clima nua che nus stuain guardar da nizzegiar l’energia a moda intelligenta.
Autur: Franziska Grossenbacherpoliticra da la verda da Berna

La protecziun dal clima saja era per el ina chaussa che stettia a cor ad el, respunda Reto Nause. Cler che in tal eveniment laschia enavos ses fastizs, il sbuf da CO2 vegnia dentant cumpensà cun certificats. Perquai saja el persvas che la bilantscha saja sut il stritg positiva.

Igl è era ina parada da prestaziun da tut ils motors cun tecnologias alternativas. I na vegn betg mo a dar la cursa mabain era in program accumpagnant correspundent. Ed jau crai che la midada da la mobilitad actuala sin la mobilitad electrica è ina finamira politica impurtanta.
Autur: Reto Nausecusseglier communal da Berna

Mintg'onn ina cursa en Svizra

E Berna na vegn betg ad esser la davosa staziun da la Furmla E en Svizra. Il mument vegn discutà d'organisar mintg'onn ina tala cursa en ina citad svizra. L'auter onn vul Turitg puspè dar albiert als autos da cursa electrics. En discussiun è era Genevra che pudess lura en dus onns esser da la partida e sch'i va sco giavischà pudess la Furmla E puspè turnar il 2022 en la chapitala Svizra.

RR actualitad 12:00