Siglir tar il cuntegn
Inhalt

helveCHia La senda da tschimas a Mogelsberg

En il chantun Son Gagl en il Neckertal è l'entschatta matg vegnì construì ina uschenumnada senda da tschimas – ina senda sin l'autezza dals spitgs da las plantas. Ils responsabels èn fitg cuntents cun ils emprims quatter mais ed han gia gì pli che 60'000 visitaders.

Iniziants da la senda da tschimas èn stads ina gruppa da lainaris indigens. Ins ha vesì sumegliantas sendas en l'Austria e la Germania e pensà che quai savess era esser insatge par la Svizra. Uschia è il matg da quest onn vegnì inaugurà l'emprima senda sin l'autezza dals spitgs da las plantas en Svizra.

Cifras e facts

  • 500 meters lunghezza
  • la gronda part tranter 4 e 15 meters autezza
  • plattafurma panoramica, pervi la pendenza dil terren dil guaud, sin radund 55 meters sur terra
  • construì en furma da serpentina (per guntgir las plantas che eran gia avant bajegiar la senda)
  • senza barriera: era en sutga cun rodas e charrotscha accessibel

Betg mo la senda sez

Sper la senda da tschimas vegni a Mogelsberg anc purschì autras chaussas: Uschia pon ins chattar sin la senda da tschimas, mo era sin ina senda sin il terren da guaud differentas tavlas d'infurmaziuns da las differentas plantas, dals animals ch'i dat en quest guaud. Ins chatta dentant er infurmaziuns davart la funcziun da la vegetaziun per l'ambient.

I dat er ina plazza da gieu sut la senda da tschimas – natiralmain è era lezza bajegiada sulettamain ord lain. Dasperas hai anc intgins lieus da grillar ed in pitschen bistro a l'entschatta da la senda.

Bilantscha fitg positiva

Ils responsabels da la senda da tschimas èn fitg cuntents cun il dumber da visitaders. Dapi l'avertura ils 10 da matg han els gia pudì notar 60'000 visitaders. Il sulet che saja betg schi bun è il traffic ch'è s' augmentà fitg pervia da la senda da tschimas, en e tras il vitg. Mo ins saja vid chattar schliaziuns cuntentaivlas per ils abitants da Mogelsberg.

Ina senda da tschimas bainprest el Grischun?

Era a Laax èn ins vegnì attents sin las sendas da tschimas e lur potenzial. La primavaira passada han ins lubì in credit da planisaziun da 130'000 francs. Mumentan èn ins anc en la fasa da planisaziun detagliada. Cun 1'700 meters lunghezza duess la senda da tschimas a Laax daventar la pli lunga da l'Europa.

RR actualitad 12:00