Igl è stà sco en in film: Senza far canera è il Smart rullà da la via giuadora e cun grond fracass directamain tras la porta da l'apoteca. In maletg che Anne-Sophie Stoll, la responsabla per la prevenziun sin las vias da Losanna, vegn mai ad emblidar. «Ina persuna è vegnida blessada levamain. Ma en l'apoteca eran da quai da diesch persunas, tranter quellas era persunas pli veglias. Cura ch'ins vesa las fotos strusch crain ins quai, i na para betg real. Sch'ins patratga, tge ch'avess pudì schabegiar è quai schon terribel. E tut quai mo pervia dad in auto che n’era betg parcà endretg.»
Adina dapli accidents
E quai schabegia adina pli savens ils davos onns. Il 2015 ha la polizia da Losanna dumbrà 44 cas, dus onns pli tard gia 63. La culpa sajan ils automobilists che na dettian simplamain betg adatg, di Stoll. «Els èn per exempel vi dal telefonin ubain èn vi da studegiar insatge e cura ch'els parcheschan lur auto emblidan els simplamain da trair endretg il frain a maun u da metter en l’emprim gir. E pervi da la pendenza da la via è la ristga gronda che l'auto sa metta lura simplamain en moviment.»
E sche l'auto haja ina giada survegnì chatsch saja memia tard. Tut il rest saja lura fisica elementara. «In auto pign è spert ina giada ina tonna e quattordesch kilometers l'ura n’èn betg la massa. Ma il mument che l'auto collidescha cun insatge èn quai otg tonnas. E quai è impussibel da franar. La suletta pussaivladad è da scappar or da via.»
Consequenzas tragicas
Il pli savens hajan els da far cun donns vi dad auters autos ubain collisiuns cun pitgas ed amplas. I haja dentant era gia dà cas tragics, raquinta Anne-Sophie Stoll. «Jau sun vegnida clamada tar in accident, nua ch'in auto è rullà da la via giuadora. Sin ses traject ès el collidà cun ina tatta ed ì sur ella ora. Schlet lieu, schlet mument. Ella è morta sin il lieu.»
Retratga da la lubientscha da charrar
Cun lur campagna da placats e flyers e cun pledentar directamain las persunas che parcheschan lur auto a l'ur da vias pendentas, veglian els far attents sin ils privels – ed era sin las consequenzas per ils automobilists fallibels. Quels ristgian numnadamain ina dètga multa e da perder per in temps la lubientscha da charrar.
RR actualitad 12:00