En montura da viagiar, cun satgados e festa da viandar èn otg persunas da viadi en la Moosalp. Plirs tschients francs ha quai custà da participar a l'excursiun da lufs, malgrà che la schanza da vesair in vair luf è oraifer pitschna.
Nus giain sin ils fastizs dal luf ed ans concentrain betg be sin l'animal. I va per l'entira experientscha da la natira, il luf e ses abitadi, la cuntrada cultura, l'uman, la muntanera da nursas... Tut quai fa part d'ina tala excursiun.
Critica d'indigens
Organisada vegn l'excursiun da lufs d'in biro da viadi lucernais. Il president communal da Törbel, che giascha 500 meters pli bass che la Moosalp, è s'exprimì critic envers SRF ch'ha rapportà dal tema.
Cura ch'jau hai udì l'emprima giada da quai, hai jau pensà: Quai è ina absoluta provocaziun.
El temia cunzunt che participantas e participants survegnian in maletg idealistic dal luf. Il luf fetschia grev ad els la vita e las consequenzas tras il luf possian la finala esser fatalas, agiunta Urs Juon.
Chapientscha per indigens
In dals participants da la safari di ch'el haja chapientscha per la populaziun indigena ch'è pli critica envers il luf, almain enfin in tschert punct. El saja s'infurmà ed haja er empruvà da tadlar omaduas varts, di il banchier privat da Turitg. Ma quai na saja betg simpel, di ina media che viva a Basilea. Ella haja cunzunt emprendì ch'il tema saja fitg cumplex, cunzunt per tgi che vivia en citads.