Originalitad, integritad, fairness e collegialitad. Quels pleds stattan per la lutga svizra, il cumbat en il resgim, um cunter um. Ma era quest sport saja confruntà cun il maldiever da substanzas, il doping. Quai di Ernst König, il directur dad Antidoping Svizra.
Las festas da lutga cuzzan in entir di, la festa federala perfin dus dis. Qua èn l’abilitad da pudair sa revegnir ed il return suenter blessuras gronds temas. Quai èn tut parameters che pon render attractiv il maldiever da doping en la lutga svizra. Perquai faschain nus qua era dapli controllas che tar autras disciplinas che pretendan autras abilitads.
2022 controllas ha la fundaziun Antidoping Svizra fatg l’onn passà. La pli gronda part tar las sportistas ed ils sportists da las disciplinas velo, atletica leva, ballape, cursa lunga, hockey sin glatsch, nudar ed era tennis. Quai mussa il rapport annual.
E quel mussa era ch'igl ha dà 74 tests tar ils lutgaders. In da quels è stà positiv. L’avrigl avant in onn han ins chattà il medicament Tamoxifen en il corp dal lutgader da tschupè Martin Grab. Curt suenter ha la segunda prova confirmà quest resultat. Il cas n’è anc betg terminà ed i vala la presumziun d'innocenza.
Popularitad e daners augmentan privel da doping
Cumpareglià cun avant paucs onns hajan els augmentà fitg il dumber da tests, di König. Quai haja era da far cun la popularitad adina pli gronda dal sport da lutga. E cun quella popularitad ed ils daners che sajan oz involvids en quest sport, creschia era il squitsch sin ils atlets da mussar prestaziun.
In fatg ch’ins sentia cunzunt en quels onns ch'i dat ina Festa federala da lutga e da gieus alpesters, sco ussa la fin d’avust a Zug. En vista a quest eveniment hajan els era adattà lur concept da controllas.
En vista da la festa federala avain nus augmentà il dumber da controllas.
Pli baud era quai anc auter. Enfin avant dus onns decideva l’Associaziun federala da lutga svizra sezza, cura e tgi che vegniva testà sin substanzas betg lubidas. In fatg che ha adina puspè procurà per critica ed ha mess en dumonda la credibilitad da quels tests. Dapi che l’associaziun è daventada commembra da Swiss Olympic avant dus onns, saja quai tut auter, di König.
Dapi dus onns tests independents
Ussa decidian els sezs co e cum ed era con savens ch'in lutgader vegnia controllà. Ed en il cas dals cas decidia era in'instituziun independenta, la cumissiun disciplinara da Swiss Olympic, davart las sancziuns. Quell'independenza na saja betg il davos era en l'interess da mintga singul lutgader è Ernst König persvas.
Quai dat ad el era la legitimaziun da dir ch’i na dettia nagin tractament spezial da la lutga svizra, mabain ch’el vegn controllà exact medem sco tut tschels atlets.
E quai augmentia la fin finala era la credibilitad da la lutga svizra. E sper l'originalitad, l’integritad, la fairness e la collegialitad è era la credibilitad quai che renda la lutga svizra uschè populara.
RR actualitad 12:00