Suenter ch'ils studis da Pisa han adina puspè mussà che mats han en media dapli fadia da leger e legian era main gugent, han ins anc ina giada rinforzà la categorisaziun da cudeschs, di Milena Eberhard. Cun far cudeschs che correspundan al stereotip dal mat han ins vulì motivar ils giuvens da leger dapli. Dentant sa mussia la categorisaziun sco dischavantatg. Quai po la germanista mussar si cun la lavur da master ch'ella ha fatg. Quella lavur mussa numnadamain che 20% dapli mats e mattas prendan cudeschs ord biblioteca ch'èn tipic per l'auter gender, sch'ins na sa betg tge cudesch ch'è scrit per tge gruppa da gender. Cun descripziun da la gruppa da gender è quella cifra tar 2%.
Sch'ils uffants n'enconuschan betg la categorisaziun dad in cudesch, prendan els en biblioteca dapli cudeschs che n'èn betg tipics per il gender.
A maun da quels resultads ha la biblioteca da la citad dad Uster eliminà la categorisaziun da gender. Finamira da Milena Eberhard fiss ch'ulteriuras bibliotecas suondian quest exempel. Cun ils resultads dal studi vul ella agiunscher uss persunas dal fatg ed era las chasas edituras.
