Siglir tar il cuntegn
cuntegn

helveCHia Paléo: Glamping enstagl camping

Il pled «glamping» deriva da la cumbinaziun da pleds «glamour» e «camping». Dapi l’onn passà pon ils visitaders decider tranter camping u glamping al festival Palèo a Nyon. L’onn passà era il glamping in grond success, perquai han ins engrondi la purschida quest onn.

Legenda: Guardar il video Glamping al Paléo Festival a Nyon. Durada 01:10 minutas.
Or da RTR dals 19.07.2018.

Chasettas e jurtas da tut las colurs e da tut las grondezzas èsi da chattar. E diversas chasettas han pannels da solar en furma da fluras da sulegl sin ils tetgs.

Las chasettas pon ins prender a fit vidas, u cun letgs, electricitad, plimas, plimatschs u era cun sientamauns. Il glamping sa chatta sin il medem areal sco il camping, è dentant serrà giu ed ha era tualettas e duschas separadas.

Tut tenor tge chasetta ch’ins prenda variescha era il pretsch. Da var 300 enfin 1'200 francs èsi da chattar da tut. Dentant era sch'ils pretschs èn auts per in festival, saja tut l’areal occupà, uschia sco l’onn passà.

Ed era il num è glamurus: Pal'Asse sa numna il glamping. Igl è in gieu da pleds – il festival quel es numnadamain sin l'areal cun il num plaine de l'Asse.

Il festival en cifras

Dapi il 1976 datti il festival a Nyon. Cumenzà ha tut cun bundant 1'800 visitadras e visitaders. Il festival è dentant creschì onn per onn ed oz vegnan mintg’onn radund 230’000 visitadras e visitaders al festival. Dumbrà sur tut ils onns han 6’436'154 persunas visità il festival. En tut haja gia dà 4'929 concerts e shows sin las tribunas. Quest onn ha lieu il festival per la 43avla giada.

Il 2017 hai dà

... passa 130 stans da mangiar e 56 bars.

... 4'800 voluntarias e voluntaris

... 544 schurnalistas e schurnalists

... 9'000 persunas per di che han pernottà al festival

... ed in budget da 25 milliuns francs.

RR actualitad 12:00