Entant che la Partida populara da Turitg haja cumplainamain manchenta il tema dal clima e stoppia perquai quintar da perder sezs, saja quai tar ils socialdemocrats in zic auter, manegia Margrith Meier dal schurnal regiunal Turitg da SRF. Tar elecziuns saja quai adina puspè sa mussà, ch’ils Verds gudognan vuschs sin donn e cust dals socialdemocrats uschespert che temas da l’ambient domineschian l'agenda. «E quai pudess bain era capitar questa giada a la PS tar las elecziuns chantunalas da Turitg», uschia Margrith Meier.
Verds e Verd-liberals profiteschan
Sper ils Verds (13 sezs) vegnan era ils Verd-liberals (14 sezs) a pudair profitar da las discussiuns actualas davart il clima. Omaduas partidas vegnan a pudair gudagnar sezs. Fertant ch’ils Verds possian far quai fitg probabel sin donn e cust dals socialdemocrats, vegnian ils Verd-liberals ad engular in u l’auter sez dals liberaldemocrats. Els sajan l’alternativa che saja il pli datiers als electurs da la PLD uschespert che temas da l’ambient domineschian las discussiuns en la publicitad.
Ils liberaldemocrats (31 sezs) na vegnian dentant pli probabel betg a perder sezs, cunquai ch'els possian profitar da las vuschs da quels che n'elegian betg pli la PPS. Uschia che Margrith Meier crai ch'i vegnia a dar ina pitschna roschada dals sezs aifer las partidas burgaisas: vul dir sezs da la PPS van a la PLD e sezs da la PLD van a la Partida verd-liberala (PVL).
Problem da la PPS cun las aglomeraziuns
A perder vuschs na vegnia la pli Partida populara dentant betg mo pervia ch'il clima saja daventà in tema actual. In auter indicatur che lascha supponer che la PPS pudess perder dumengia proxima vuschs tar las elecziuns chantunalas, èn ils resultats da las elecziuns communalas avant in onn.
Qua ha la PPS fatg tras in debachel cun perder fitg blers sezs en ils parlaments e las regenzas communalas.
La raschun saja, uschia l’analisa, che la populaziun en las aglomeraziuns saja creschida adina pli fitg dapi las ultimas elecziuns. Quellas vischnancas sajan en consequenza vegnidas pli e pli urbanas e cun quai sajan era ils basegns en las vischnancas sa midads – vul dir: «Tuttenina èsi stà pli impurtant per ils avdants da quellas vischnancas d'avair per exempel avunda plazs per canortas», concluda Margrith Meier. «E qua èn la PS u er la PLD pli activas e prontas da far insatge.»
PPS e PLD defendan segund sez
Las discussiuns actualas dal clima èn bain d’avantatg per ils Verds ed ils Verd-liberals e vegnan pli probabel era a procurar per in u l’auter sez dapli en il parlament chantunal. Dentant sch’i giaja per las elecziuns da la regenza chantunala, na vegnia quella unda verda betg a pudair influenzar fitg ils resultats a favur dals Verds, crai Margrith Meier. E quai malgrà che las retschertgas actualas mussan ch’il candidat dals Verds, Martin Neukom, è fitg datiers da Thomas Vogel, il candidat da la PLD che vul defender il segund sez da sia partida. «Il ticket burgais gioga dentant la pli impurtanta rolla en quellas elecziuns», è Margrith Meier dal Schurnal regiunal Turitg (SRF) persvasa. E quest ticket da PPS, PLD e PCD vegnia a funcziunar, damai ch’il chantun Turitg saja sco chantun orientà sin la vart burgaisa.
Natalie Rickli tant sco elegidà
Uschia fissi era ina gronda surpraisa, sche la cussegliera naziunala da la PPS, Natalie Rickli na vegniss betg elegida en la regenza dal chantun Turitg. «Natalie Rickli è tant sco elegida damai ch'ella è era sin quest ticket da las partidas burgaisas», concluda la redactura dal Schurnal regiunal Turitg che rapporta gia dapi onns regularmain or dal parlament chantunal. Quest segund sez da la PPS en la regenza saja perquai tant sco segir.
Naginas surpraisa
Grondas surpraisas n’èsi perquai betg da spetgar. Quai vala quella giada era per ils tschintg cussegliers guvernativs che candideschan per in'ulteriura perioda d'uffizi. «Quels sesan tuts bain en lur sella, damai ch’els n’han era betg fatg sbagls sco auters onns», manegia Margrith Meier. Uschia che la regenza dal chantun Turitg vegn, sch'i na dat betg ina pli gronda surpraisa, vinavant a sa cumponer da dus cussegliers guvernativs da la PPS, dus da la PLD, dus da la PS ed in da la PCD.
RR actualitad 12:00