Rendez-Vous cun Brigitte Roux

Actualmain datti in spectacul da glisch e musica vi da la Chasa federala che sa numna «Rendez-vous Bundesplatz». Cun projecturs vegn la Chasa federala animada. Quest onn mussa la fatschada l'istorgia da la refurmaziun. Il project vegn manà da l'artista Brigitte Roux.

Laschar ir video «Rendez-vous sin la plazza federala»

Rendez-vous sin la plazza federala

1:09 min, dals 26.10.2017
Sursiglir cuntegn supplementar

La show en cifras:

  • 7avel spectacul
  • 500 onns refurmaziun è il tema
  • 550'000 – 580'000 visitadras e visitaders
  • 8 projecturs
  • 72'500 purtrets singuls
  • 18 scenas
  • 25 minutas
  • 23 milliuns pixels
  • 240'000 ANSI lumen
  • 1 milliun budget da sponsurs

Subit che la musica cumenza è tut che tascha sin la Plazza federala: Igl è stgir e tut quiet entamez la citad nua ch'i pulsescha uschiglio. Tut ils egls èn drizzads sin la Chasa federala che vegn illuminada cun otg projecturs.

Mintg'onn vegnian fin a 580'000 persunas a guardar las istorgias animadas cun glisch da l'artista turitgaisa Brigitte Roux. Ina dunna da 60 onns che ha bler pepp.

«  Jau aveva la visiun dad inscenar la Chasa federala e sco tar il motto da Hermann Hesse 'Ins sto pruvar l'impussibel per cuntanscher il pussibel' vai jau dà tut per realisar mia visiun. »

Brigitte Roux
Starlight Events

imPUSSIBEL

Tut ha cumenzà cun ina visiun che pareva quasi impussibla. Per realisar quella visiun ha la turitgaisa Brigitte Roux stuì cumbatter quatter onns. Temp e pazienza haja duvrà per survegnir ils permis per pudair realisar la visiun. Quasi nagin che crajeva vi da l'idea Brigitte Roux:

«  Grazia a mes chau dir poss jau uss inscenar la Chasa federala. »

Brigitte Roux
Starlight Events

I haja vulì curaschi da bleras persunas ed anc ina giada ina purziun dapli fiduzia en ina chaussa ch'ins na sa pudeva betg imaginar. Ed uss ha il spectacul lieu per la settavla giada.

«  Jau vuless striunar o meglier dit intgantar las persunas. Per in curt mument sa duai emblidar il mintgadi. »

Brigitte Roux
Starlight Events

Var 35 persunas han lavurà vi da la show che sa numna «Reset» e ch'inscenescha la refurmaziun. Suenter tut la lavur en l'atelier haja vulì quatter dis e trais notgs be per installar la show sin la Plazza federala.

Ed er sche tut la Plazza federala e plaina da glieud durant la show na s'auda gnanc in tun apaina da l'emprim fin a l'ultim tun da la musica.

Il spectacul «Rendez-vous am Bundesplatz» ha lieu mintga saira dals 13.10.17 - 25.11.17 a las 19:00 e a las 20:30.

RR actualitad 12:20