Siglir tar il cuntegn

Header

cuntegn

helveCHia Sch'il postin porta il paun frestg

A Berna testescha La Posta Svizra ensemen cun la Confisaria Eichenberger in abunament da paun.

Mo per gist evitar speculaziuns: La Posta Svizra n’ha betg avert ina pasternaria. Lur incumbensa principala saja anc adina il transport da pachets e brevs dad in lieu a l'auter, di François Furer, il pledader da La Posta Svizra. Fatg saja dentant, ch’il dumber da brevs ch'els transportan saja sa reducida per bunamain in terz ils ultims diesch onns.

Noss postins han adina pli paucas brevs cun els. Nus stuain guardar che nus possian porscher novas offertas sin l’uschenumnada ultima miglia. Quai per mantegnair las plazzas cumplainas. Quai è impurtant per la Posta Svizra.
Autur: François Furer pledader da La Posta

Il project da la «posta da paun» è ina collavuraziun da La Posta Svizra cun la Confisaria Eichenberger, ina fatschenta da tradiziun che producescha dapi passa 150 onns a Berna. Daniel Eichenberger, il manader da fatschenta da la confisaria, è fieu e flomma per la nova purschida.

Nossa finamira è da furnir paun artisanal a chasa. Per realisar quai è La Posta il partenari ideal.
Autur: Daniel Eichenberger Manader da la Confisaria Eichenberger

Nagina concurrenza per pasternarias

La «posta da paun» è ina sort abunament. Via la pagina d'internet da la Confisaria Eichenberger pon ins s'inscriver e decider, tge sort da paun ch'ins vul e tge dis ch'il paun frestg duai vegnir furnì. Tut tenor sort e frequenza custa l’abunament da quatter emnas tranter 17 e 105 francs. La purschida nova na duai dentant betg far concurrenza a las pasternarias tradiziunalas, accentuescha Daniel Eichenberger. L’abunament saja en emprima lingia per persunas che lavurian e che n’hajan betg il temp dad ir en ina pasternaria ubain er per persunas che na sajan betg uschè bain en chomma e per ils quals quella purschida muntia in levgiament.

audio
Mezdi: HelveCHia – Posta da paun a Berna
ord Actualitad dals 14.02.2019.
laschar ir. Durada: 3 minutas 38 Secundas.

Mintga damaun a las tschintg vegnian ils pauns ord il furn. Silsuenter vegnian las empustaziuns preparadas ed adressadas. Ils chanasters cun ils stgarnuzs da paun transportan ils chauffeurs da la confisaria direct als uffizis da distribuziun da La Posta. Da là prendan ils postins ils pauns ensemen cun las brevs sin lur tura e mettan il paun frestg en la chascha da brevs. Quai funcziuneschia fitg bain, era sch'i dettia schon inqual sfida, di François Furer.

La pli gronda sfida èsi da guardar ch'il paun resta sitg, cura ch’i plova. E quai èn noss postins buns da far. Quai munta ch’il paun vegn tar il client en la medema qualitad ch’el vegn ord la pasternaria.
Autur: François Furer pledader da La Posta

Era en autras regiuns?

A quants clients ch'els furneschian oz il paun na leva Daniel Eichenberger betg tradir. Anc na fetschian els dentant betg la gronda fatschenta. Enfin la stad veglian els ussa empruvar e lura decider co prosequir. François Furer da La Posta Svizra è in zic pli optimistics. Sch'els vesian che la purschida chattia propi accoglientscha tar la clientella, veglian els ponderar da lantschar la «posta da paun» era en autras regiuns da la Svizra.

RR actualitad 11:00

Artitgels legids il pli savens