Siglir tar il cuntegn

Header

Po tar Turin
Legenda: Keystone
cuntegn

Setgira Italia vul aua da la Svizra

Pervi da la setgira ha l’Italia problems dad aua. Il flum Po ha in livel d’aua uschè bass sco dapi 70 onns betg pli. En diversas regiuns da l’Italia n’haja betg pli plovi per radund quatter mais. Oravant tut per l’agricultura ha la mancanza dad aua consequenzas. La racolta è periclitada. Uschia è quai il cas en l’Italia dal nord en las regiuns da Piemont, Lombardia ed Emilia-Romagna. Il secretari general da l’uffizi, ch'è responsabel en Italia per la surveglianza dal flum, Meuccio Berselli, appellescha a la Svizra ed oravant tut al Tessin da sustegnair il livel dal Lago Maggiore tras ils lais da fermada en las alps.

audio
Italia dumonda la Svizra per aua
ord Actualitad dals 24.06.2022.
laschar ir. Durada: 3 minutas 12 Secundas.

Era en il Tessin manca l’aua

Il livel dals lais e dals flums en il Tessin è preoccupant, scriva il radio e televisiun Svizra taliana RSI. Era quel dals lais da fermada èn sin livels bass, numnadamain tar baud 27%. Quai è dubel uschè bass sco la media che è vegnida mesirada da quest temp en ils ultims onns. Perquai n’èsi betg uschè simpel da pumpar aua en il Lago Maggiore che gidass uschia era a l’Italia.

Il livel dal Lago Maggiore è per il mument istoric bass cun 22%. Sche quel sa sbassas anc dapli, n’avess quai betg mo consequenzas per il territori direct al lai, mabain era enturn il lai ed uschia era per l’Italia che ha gia problems cun l’aua. Il Lago Maggiore numnadamain proveda la planira dal Po cun aua. Per entant po be 50% da l’aua duvrada vegnir dada enavant a l’Italia, scriva la gasetta taliana «La Stampa». E pli mal saja ch’ins possia mo anc dar vinavant aua per in per dis, suenter san ins betg co ch'i va vinavant. I saja ina da las grondas crisas insumma, di la respunsabla per il livel di, Doriana Bellani, ch'è dapli 46 onns responsabla per il livel dal Lago Maggiore. Cun uschè pauca aua n’haja ella anc mai vis il lai.

RTR actualitad 17:00

Artitgels legids il pli savens

Scrollar a sanestra Scrollar a dretga