Siglir tar il cuntegn

helveCHia Studio Berna duai far midada a Turitg

«Echo der Zeit», «Rendez-vous» u ditg simpel: tut l'infurmaziun ch'ins auda sin ils emetturs dal Radio SRF vegn producida davent dal Studio Berna. Quest studio duai vegnir dischlocà a Turitg. Però ils radund 180 collavuraturs e collavuraturas pertutgads sco er la politica van sin las barricadas.

Legende: Audio Mezdi: Helvechia: Protest per la plazza da medias a Berna abspielen. Laufzeit 05:01 Minuten.
05:01 min, Actualitad dals 30.08.2018.

Pachetar en microfons a Berna e pachetar or els a Turitg. Baud duai l’entira redacziun d’infurmaziun dal Radio SRF chattar in nov suttetg a Turitg Leutschenbach. Per las radund 180 collavuraturas e collavuraturs dal studio Berna in scenari che fa tema, uschia descriva Priscilla Imboden la situaziun. Ella sezza è schurnalista tar SRF, co-presidenta dal SSM da radio Berna e commembra da la gruppa da lavur «Pro Radiostudio Bern» - ina gruppa ch'è sa furmada sco gruppa da protest cunter la midada. La dischillusiun saja fitg gronda.

Las collavuraturas e collavuraturs teman per lur futur. La malsegirezza è gronda ed era la dischillusiun. Gist suenter la debatta da No Billag – nua che nus ans essan engaschads fitg per SRF e per la SRG – è la novitad da la midada stada in schoc.
Autur: Priscilla ImbodenCopresidenta SSM Radio Berna / commembra «Pro Radiostudio Bern» / Schurnalista SRF

Ina midada a Turitg mettess sutsura il mintgadi per blers, uschia Imboden. I dettia era gia diversas collavuraturas e collavuraturs ch'hajan dà la desditga, tranter auter causa la gronda malsegirezza che regna.

In um – ina visiun

Era sch'ils formats d’infurmaziun, oravant tut l'«Echo der Zeit» èn formats cun ils pli blers auditurs, giaja la cifra da l'auditori enavos. Il directur da SRF, Ruedi Matter, vul dapli innovaziun, quella duess avair lieu a Turitg. Là sajan avant maun ils instruments ch'i dovria per far quai. A Turitg duajan vegnir unids radio, televisiun ed online.

Las sinergias possian uschia vegnir duvradas meglier, di Matter. In dils arguments principals è era il respargn. L’entira SRG sto spargnar, cunquai ch'i dettia pli pauc daners en il futur. La gronda part sto vegnir spargnada tar SRF. Cun unir ils vecturs a Turitg e vender las immobiglias possia vegnir spargnà, senza che persunas stoppian vegnir relaschadas, di il directur. Natiralmain saja dentant da far quint che diversas schurnalistas e schurnalists na fetschian betg il pass a Turitg. Dentant hajan ins adina pudì mantegnair la qualitad – e qua vegn ad esser il cas era questa giada, è Ruedi Matter persvas.

Spargnar immobiglias – betg persunal

Tschintg milliuns francs pudess ins spargnar cun transferir il studio da Berna a Turitg tenor Matter. Vul dir: Il radio duai vegnir dischlocà da Berna e la direcziun generala da la SRG duai midar en ils biros, nua ch'il studio è oz.

Durant la debatta da No Billag hai adina gì num che nus stoppian vegnir pli pitschens, e cun la nova concessiun stuain nus era spargnar. Ed uss che nus empruvain da spargnar betun empè da persunas, n'è quai era betg endretg.
Autur: Ruedi MatterDirectur SRF

Ils tschintg milliuns èn dentant dispitaivels, sco quai ch'il cusseglier guvernativ da Berna Christoph Ammann di. El haja era fatg quints e vegnia maximalmain sin la mesadad dals custs, di il Bernais che vul ch’il studio resta.

La citad da Berna haja preschentà 18 autras immobiglias per dar suttetg a la direcziun, di Ammann. Da quellas na vegnia nagina en dumonda, di Ruedi Matter. A quella conclusiun sajan vegnids ils experts d'immobiglias da la direcziun generala.

Politica fa squitsch

Christoph Ammann n'è betg l’unic exponent politic che crititgescha las ponderaziuns da far midada. Politicras e politichers regiunals sco era naziunals s’expriman cunter ina centralisaziun a Turitg. Per els fiss quai ina sperdita da qualitad da schurnalissem. Sch’ins lavura e viva a Turitg, hajan ins in’autra vista sin tematicas che sch'ins viva e lavura a Berna, di il minister d’economia da Berna Chrstoph Ammann. Gia las gasettas sa focusseschan mo pli sin Turitg, dentant dovria era autras perspectivas, gist a Berna ch'è ina punt en la Svizra franzosa di Ammann.

Che Berna perdess plazzas da lavur è mo secundar. Il problem principal d'ina midada ves jau tar la qualitad schurnalistica. La centralisaziun al martgà da medias svizzer a Turitg è in svilup fitg nausch, cunquai ch'ins avess uschia adina pli ferm il punct da vista da Turitg e betg da tut la Svizra.
Autur: Christoph AmmannCusseglier guvernativ da Berna

Era sch'il squitsch da la politica e aut, na tema Ruedi Matter betg che quai pudess avair in'influenza sin las discussiuns davart il futur da la SRG, sco per exempel la nova lescha da medias.

Ils ins èn persvas ch'ina midada fiss ina sperdita da qualitad, da persunal qualifitgà e da l’idée suisse. Ils auters èn persvas che per l’innovaziun, il svilup ed uschia finalmain per il program fiss la midada in gudogn.

Sch'i dat ina midada u betg decida il cussegl d’administraziun il pli baud mez settember.

Protest a Berna

Oz datti ina acziun da protest a Berna. Cun quella speran las collavuraturas e collavuraturs da segirar il futur dal studio da radio Berna.

RR actualitad 12:00