Siglir tar il cuntegn

Header

audio
Mezdi: Neuchâtel ed il cumbat cunter il zutger
Or da Actualitad dals 30.01.2020.
laschar ir. Durada: 03:46 minutas.
cuntegn

Taxa sin zutger Cumbatter il mal a la ragisch

Il chantun da Neuchâtel vul promover la sanadad dals dents e propona d’introducir ina taxa sin bavrondas dultschas.

Quai avain gia emprendì en scola: Memia bler zutger fa donn als dents. Malgrà quai baiva mintga Svizra e mintga Svizzer en media 80 liters bavrondas dultschas mintg'onn. Ed il trend mussa vinavant ensi.

A quest svilup vul la regenza dal chantun Neuchâtel ussa far frunt. Ella propona d'introducir ina taxa sin las bavrondas dultschas. Cun ils daners duai vegnir finanziada ina campagna per promover l'igiena e la sanadad dals dents. Quai ha il cusseglier guvernativ Laurent Kurth ditg a la televisiun da la Svizra franzosa.

La taxa n’è betg fitg auta. Nus essan tar 15 enfin maximal 20 raps per liter. Quai che fa in franc per mais e persuna. E surtut, igl è ina taxa che mintgin da nus po evitar sch’el renunzia a bavrondas che na fan betg bain a nossa sanadad.
Autur: Laurent Kurthcusseglier guvernativ Neuchâtel

Annunzià quels plans n’ha la regenza dentant betg dal tut ord libra voluntad. Avant quatter onns è vegnida inoltrada in'iniziativa chantunala che pretenda d'introducir in’assicuranza da dents obligatorica per tut la populaziun da Neuchâtel. Ils daners per quella duain vegnir via ina taglia sin las pajas. Projects sumegliants en ils chantuns Genevra e Vad han gì fatg naufragi a l'urna ils ultims onns.

Malgrà quai vul la regenza tuttina porscher maun per in pass vers in'alimentaziun pli sanadaivla. I dettia numnadamain schon in basegn d'agir, sch'ina part da la populaziun na possia betg sa prestar dad ir tar il dentist, cura ch'els han in problem, ha Kurth ditg al radio da la Svizra franzosa.

L'idea è da promover gia tar ils pli giuvens in cumportament positiv per la sanadad dals dents, quai cun mesiras da prevenziun, cun profilaxa e cun render pli favuraivel l’access al tractament per tschertas parts da la populaziun.
Autur: Laurent Kurthcusseglier guvernativ Neuchâtel

Concret duain uffants tranter trais e tschintg onns pudair ir gratuitamain a laschar controllar lur dents. Ultra da quai duain vischnancas survegnir sustegns per programs per la tgira dals dents en scola. En il Vallais datti quai gia. Là surprendan chantun e vischnancas mintgamai 40 pertschient dals custs dal dentist per uffants enfin 15 onns.

Pauc plaschair da la proposta da la regenza han dentant ils commerziants da victualias ed ils ustiers. La presidenta da GastroNeuchâtel, Carolina Juillerat, declera pertge:

I tutga puspè nus, las ustarias e negozis avain da pajar quella taxa. Atgnamain stuessan ils producents da las bavrondas dultschas vegnir obligads da pajar quella. Nus mo vendain lur products.
Autur: Carolina Juilleratpresidenta GastroNeuchâtel

Che lur proposta na cuntenta betg tuts sa Laurent Kurth. Tut en tut saja quella dentant in pass en la dretga direcziun.

Oz stuain nus constatar che era sche nus proponin da far ina segirada ha la populaziun resalvas guardond sin ils daners ch'els pajan gia per l’assicuranza da malsauns. E sch'ins propona novas prestaziuns quintan els cun novs custs. Qua vegnin nus ussa cun insatge nov, igl è in progress cun custs fitg moderads.
Autur: Laurent Kurthcusseglier guvernativ Neuchâtel

Sceptics èn dentant era ils auturs da l'iniziativa chantunala per ina assicuranza per tractaments dals dents. En las medias han els laschà savair che la proposta na distgargia betg avunda la classa mesauna. E sch'il parlament chantunal suonda la regenza n’è era anc betg cler. Il Cussegl grond da Neuchâtel tracta la fatschenta probabel il settember.

RTR actualitad 12:00

Dapli da helveCHiaavrir la Landingpage

Nach links scrollen Nach rechts scrollen