Siglir tar il cuntegn

Header

audio
Mezdi: HelveCHia - a Kerns vegn tratg la sort per las alps
Or da Actualitad dals 05.12.2019.
laschar ir. Durada: 02:49 minutas.
cuntegn

Tratga d'alp En Sursilvania decida la sort tgi che dastga duvrar l'alp

En il chantun Sursilvania decida la sort tgi che dastga ir cun ses muvel durant la stad ad alp. La repartiziun è stada dacurt en la Dosenhalle a Kerns. Igl è stà in spectacul che ha carmalà blers aspectaturs e che nagin n'ha vulì manchentar.

Ils 30 da november 2019 èn bunamain 1'000 commembers da la Cooperaziun d'alp Kerns sa radunads en la Dosenhalle per persequitar la tratga da la sort per las alps en la Sursilvania. Mintga 12 onns vegnan las 38 alps da la cooperaziun da Kerns repartidas a novs fittaders. Cunquai ch’i dat 76 bains purils ch’èn s’annunziads per las alps, vegn tratg la sort per tractar tuts tuttina.

La sort decida davart l’existenza

Tenor Markus Durrer, il chau d’alp, vai per ina surfatscha da 1'900 hectaras, nua ch’il muvel po pavlar durant la stad. La qualitad dals prads varieschia fitg ed uschia saja l’interess per in alp fitg different. Uschia fetschian part tar ina sort fin 40 persunas è tar autras sulettamain in bain puril. Quels che gudognan hajan lura il dretg da laschar pavlar il muvel là per 12 onns fin la proxima occurrenza.

Naginas buccas nauschas

Quels che na survegnian dentant nagina alp stoppian tut tenor diminuir lur muvel per fin 25%. E quai tut, perquai ch’ins ha gì disfortuna. Markus Durrer di dentant ch’i na dettia naginas buccas nauschas, cunquai che l'usit da trair la sort saja acceptà dals purs. Il trair la sort succeda gia 3 onns avant ch’ils novs fittaders possian metter il muvel sin l’alp. Uschia hajan ils vegls fittaders avunda temp per sa reorganisar.

RTR actualitad 12:00