Siglir tar il cuntegn

Header

audio
Mezdi: Sfidas dal rumantsch e talian en societad che sa transfurma
Or da Actualitad dals 28.11.2019.
laschar ir. Durada: 05:34 minutas.
cuntegn

Turitg «La Svizra è er taliana e rumantscha»

Sut quest titel ha gì lieu a Turitg in colloqui davart las sfidas dal talian e rumantsch en ina societad en transfurmaziun. Da la partida èn stads sper represchentants da las uniuns linguisticas er glieud da la politica, perscrutaziun e medias.

Ils dus temas centrals da l'inscunter èn stads l'instrucziun en scola e las medias da las linguas minoritaras. Davart quels dus temas han ils visitaders pudì tadlar plirs referats da persunas dal fatg. Vinavant èn vegnids preschentads intgins projects che sajan «buns exempels».

Instrucziun en scola

L'instrucziun en scola tutga tar las chaussas centralas per la promoziun da linguas minoritaras. Quai ha ina da las emprimas pledadras dal di fatg cler. Vinavant saja l'instrucziun er in punct central da la «Charta europeica da las linguas regiunalas u minoritaras». Quella charta definescha co che las linguas minoritaras duessan vegnir promovidas e protegidas. La Svizra ha ratifitgà quella charta l'onn 1997.

Nov material d'instrucziun.
Legenda: Ils participants sa fatschentan cun nov material d'instrucziun. RTR, Flurin Clalüna

Tar las sfidas per il futur è pliras giadas vegnì menziunà la mancanza da bun material. Survegnir il sustegn finanzial per quels saja difficil. Vinavant saja difficil da chattar las persunas qualifitgadas per crear quai material.

FMR sco «buna practica»

Er davart las medias è vegnì discutà. Suenter in pled d'introducziun ha la presidenta da la Fundaziun medias Rumantschas Corina Casanova preschentà lur fundaziun e las miras. Il model saja innovativ per promover las medias rumantschas.

Vinavant ha il confundatur da la plattafurma online «Il Bernina» preschentà ses project. Dapi bunamain 15 onns è quai ina pagina d'internet cun novitads per il Puschlav. Il confundatur Danilo Nussio ha dentant fatg attent sin la pli gronda sfida: ils raps. Cura ch'el haja lantschà la plattafurma haja el survegnì grond sustegn. Suenter in pèr onns saja il sustegn dentant ì enavos. La finanziaziun saja vinavant ina sfida.

Uragliers per translaziun.
Legenda: Mintgin discurra en sia lingua materna. Per ch'ins chapescha in l'auter han ils organisaturs mess a disposiziun in servetsch da translatur. Mintga referat e pled è vegnì translatà per tudestg, franzos e talian. Ina translaziun rumantscha mancava dal rest. Ils represchentants rumantschs han stuì tscherner in'autra lingua. RTR, Flurin Clalüna

RTR actualitad 11:45