Siglir tar il cuntegn

Header

video
Urban Swimming – in trend da citads svizras sa derasa en metropolas
Or da Giuventetgna dals 05.07.2019.
laschar ir. Durada: 59 Secundas.
cuntegn

helveCHia Urban Swimming – in privilegi en Svizra

Genevra, Basilea, Berna u Turitg: en las citads svizras vegn nudà en ils flums. Il trend per il uschenumnà «Urban Swimming» tschiffa adina dapli persunas. Perquai ha il museum d’architectura Svizra deditgà in’exposiziun a las quatter citads e lur flums.

Flums n'èn betg pli «be» flums en las quatter grondas citads en Svizra. Las auas èn sa sviluppadas ad in spazi public. A Basilea è il Rain perfin il pli grond spazi public da la citad.

Il flum porschia ina pussaivladad da giudair il temp liber e da recreaziun entamez las citads, di il curatur assistent dal museum svizzer d’architectura, Yuma Shinohara.

audio
Bunura: Urban Swimming
ord Actualitad dals 05.07.2019.
laschar ir. Durada: 3 minutas 46 Secundas.
Ils flums èn daventads en las citads ils centers publics per activitads socialas.
Autur: Yuma Shinohara Curatur assistent dal Museum d'architectura svizzer

Da duvrar ils flums sco spazi public porschia in plus da qualitad da vita en las citads, di Shinohara. Uschia hajan era las citads sez cumenzà a far reclama per l’«Urban Swimming».

Ed avant in per onns ha l’Uffizi federal da cultura prendì si il nudar en il Rain a Basilea ed il sa laschar trair da l’Aara a Berna en la glista dal patrimoni cultural immaterial da la Svizra.

Flums svizzers sco funtaunas d'inspiraziun

Entant ch'il nudar en il flum tutga en las citads Svizras tar il mintgadi, èsi en autras citads inimaginabel dad ir a nudar en ils flums. Quai vulan divers architects sin tut il mund midar. Il trend svizzer haja servì sco funtauna d’inspiraziun per projects en metropolas sco New York, Boston u Paris.

A l’architect che vul realisar in bogn public en il Thames a Londra saja l’idea perfin vegnida cun sa nudar en la Limmat a Turitg, quinta Yuma Shinohara.

Dentant na possian ins betg simplamain exportar il model «Urban Swimming» d'ina citad a l'autra. Mintga citad haja ses agen ritmus e ses agen spiert – uschia er ils flums. I fiss er faus da congualar il trend da Basilea, Berna, Genevra e Turitg in cun l'auter. Mintga citad va enturn auter cun il trend – ed il siglir en l'aua è tar mintga flum in'autra experientscha.

RR actualitad 08:15

Artitgels legids il pli savens