Siglir tar il cuntegn

Header

Navigaziun

cuntegn

Viafiers federalas svizras Proxima fermada Museum d'art applitgà

Il Museum d'art applitgà a Turitg è sa transfurmà en ina staziun da viafier. I na parta dentant nagin tren da questa staziun. Ins po però far in viadi tras il temp – tras l'istorgia da design da las Viafiers federalas svizras.

E sin quest viadi è Andres Janser il locomotivist, u meglier ditg il curatur. Sch'el guarda enavos sin l'istorgia da design da la SBB, dat al fan da las viafiers surtut ina constanta en egl:

Ina tscherta sort dad umor è sa mantegnì tras e tras sin ils placats da las Viafiers federalas.
Autur: Andres JanserCuratur dal museum d'art applitgà

Uschia sa regorda Janser per exempel vi da placats cun slogans ch'èn restads en memoria enfin oz: «Der Kluge reist im Zuge» u «Gute Idee SBB».

Stop da giugar

In auter fan da trens è Heinz Peter Stucki. El construescha models da viafier. Ensemen cun auters ha el mess a disposiziun ina part da ses models per l'exposiziun. I na sajan models che mussan in ad in cuntradas svizras. Dentant hajan las cuntradas ina tscherta «swissness», declera Stucki cun mussar sin in dals models nua ch'in tren passa sur ina punt en ina cuntrada da guaud.

La decisiun da metter a disposiziun ils models n'è betg stada simpla: Uss na pudain nus betg pli lavurar e giugar a chasa cun nossas viafiers.
Autur: Heinz Peter StuckiConstruescha viafiers da model

I saja in dals hobis ils pli variads, defenda Stucki il giugar e lavurar cun models da viafiers. Ina u l’autra remartga stoppia el adina puspè udir. Dentant fetschia el lura reclama per in passatemp che vegnia sutvalità: Els hajan ina giada dumbrà quants mastergns ch'il construir models cumbineschia. I sajan var 50 – da l’electricist enfin tar l’ortulan.

Da mussar ils models ad in public pli grond saja ina schanza per il hobi. Els sa legrian lura dentant er puspè, cura ch'ils models sajan puspè a chasa pronts per lavurar e giugar, di Heinz Peter Stucki cun in rir.

L'exposiziun dura enfin ils 5 schaner 2020.

RR actualitad 12:00