Cura che la Confederaziun aveva ordinà avant in'onn l'obligatori da homoffice era la chaussa clera: Il patrun sto surprender ils custs per il homeoffice. Quest artitgel na fa dentant betg pli part da l'ordinaziun da Covid-19 actuala.
Seco: «Nagin obligatori»
Tge vul quai uss dir? Tenor il Seco, il Secretariat dal stadi per economia, na datti nagin obligatori ch'il patrun sto surprender ils custs. Auter vesa quai l'Uniun sindicala svizra. Malgrà che l'artitgel n'è betg explizit en l'ordinaziun actuala, dastgian lavurantas e lavurants pretender ina restituziun da tut ils custs da lur patrun, ha ditg Luca Cirigliano, secretari general dal SGB, envers l'emissiun «Espresso» da Radio SRF.
Vul dir: pajair ils custs per pupi da squitschar, metter a disposiziun il laptop e surpigliar ina cumpart dals custs. Perquai ch'il artitgel è crudà davent valia numnadamain uss il dretg da lavur e tenor quel dettia tschertas prescripziuns.
Patruns vesan quai in zic auter
Auter tuna quai tar l'Uniun svizra da las patrunas e dals patruns. Els n'hajan gea betg ordinà quest obligatori, mabain la Confederaziun. «Ord quest motiv na stuain nus era betg surpigliar ils custs», ha ditg Daniella Lützelschwab, da l'Uniun svizra da las patrunas e patruns.
L'experientscha haja dentant mussà ch'ins chattia bain ina soluziun sch'ils patruns e las patrunas discurran cun ils lavurants e cuntrari. En general èn omaduas partidas da l'avis: Avant ch'ins tramettia simplamain in quint, duajan ins discurrer in cun l'auter en chaussa.
