Durant l'ultima stagiun da ballape en Svizra hai dà tar mintga terz gieu da las duas ligas autas, violenza u schizunt greva violenza. Quai mussa il nov rapport da l'Uffizi federal da polizia Fedpol. Betg quintà ha l'uffizi ils radund 150 gieus senza aspectaturs. En cumparegliaziun bler pli paschaivel èsi en las duas ligas autas dal hockey sin glatsch. Là hai tenor il Fedpol be dà violenza tar mintga 10avla partida.
En il register da hooligans eran nudads il zercladur passà 1'525 persunas. Be 23 da quellas èn dunnas. 1'089 dals registrads han ina colliaziun tar il ballape e 493 tar il hockey.
Ils delicts pli frequents da hooligans ch'èn vegnids registrads enfin il zercladur 2020 èn stads violaziun da la pasch publica (387), surpassaments da la lescha davart materials explosivs (298) ed il scumond da zuppentar la fatscha (251) sco er violenza e smanatschas cunter funcziunaris (168).