Gieus da ballape da risico nua che hooligans attatgan ils policists cun barricadas u demonstraziuns nua ch'il bloc nair randalescha ed impedescha la lavur dals pumpiers e da la sanitad. Adina puspè aud’ins e ves’ins tals excess. E l’Uffizi federal da statistica mussa che las denunzias pervia da violenza e smanatschas cunter funcziunaris dal stadi èn s'augmentadas per circa 1/3 sin passa 3’000 cas ils ultims diesch onns.
Da simplamain dir che quai sajan ristgas ch'ins haja da purtar sch'ins saja sa decidids per ina clamada en il servetsch da la populaziun, ha Stefan Engler, il cusseglier dals chantuns cristiandemocrat dal Grischun, betg laschà valair.
Quels che tegnan nà lur chau per nossa segirtad dastgan persuenter spetgar che nus sustegnain els.
Per chastiar pli sever ils malfatschents ha el perquai fatg la proposta che multas duain mo pli esser lubidas en cas levs. Per regla duai dar painas da libertad d'enfin trais onns. En cas da violenza cunter persunas u chaussas duai la paina da libertad esser obligatorica.
Nagins chastis minimals – in dischavantatg
Chastis pli severs aveva era la maioritad da la cumissiun proponì. En cas da violenza cunter persunas e chaussas na duevan las multas dentant betg esser pli bassas che 120 taxas per di e tar la paina da libertad betg pli pauc che 120 dis.
La fin finala saja quai pli sever che la proposta dad Engler ha per exempel la Cussegliera federala Karin Keller-Sutter argumentà. Lezza na prevesia nagins chastis minimals. Il problem vesa la ministra da giustia dentant anc insanua auter. Gia la lescha actuala porschia avunda pussaivladads da chastiar malfatschents.
Ins sto simplamain far star bun quellas persunas, manar ellas avant dretgira e lura era chastiar els. Las pussaivladads per sancziuns penalas èn vastas e sin maisa.
Ina maioritad da la chombra pitschna leva dentant dar in cler signal ed ha cun 25 cunter 17 vuschs dà preferenza a la proposta da Stefan Engler. En ina da las proximas sessiuns tracta il Cussegl naziunal la fatschenta.
