Datiers da Hospental en il chantun Uri è in aviun pitschen crudà giu la dumengia suentermezdi. Il pilot tudestg da 60 onns, ch'era da viadi persul, ha pers la vita, ha communitgà la Polizia chantunala da l'Uri.
Suenter in'acziun da tschertga pretensiusa hajan ins chattà la bara ed il vrac da l'aviun en il territori dal Gloggentürmli sin 2'700 meters sur mar. Pertge che l'aviun pitschen è crudà giu n'è anc betg cler. La Polizia chantunala dad Uri ed il Servetsch svizzer d'inquisizun da segirezza SUST han instradà las investigaziuns.
Tschertga pretensiusa
Annunzià la crudada pussaivla aveva l'Aviation RCC Turitg a la polizia dal chantun Uri. Nua exact che l'aviun pudess esser crudà giu n'han ins l'entschatta betg pudì eruir. Perquai ha la Polizia chantunala da l'Uri instradà ina tschertga gronda. Perquai ch'igl aveva dentant tschajera fitg spessa, han ins be pudì tschertgar a pe. Cumenzà la tschertga avevan ins nà dal Tessin e da l'Uri.
Chattà la bun'ura baud
Enturn mesanotg è la vista lura puspè vegnida meglra. Lura han ins era chattà l'aviun pitschen cun in superpuma. Enturn las 03:00 la bun'ura han ins lura chattà l'aviun. Il pilot han ins dentant be pli chattà mort.