Giusep Fry surdat suenter radund 40 onns a la testa il manaschi sin il Uetliberg a ses figl Fabian. Quai scriva la Uto Kulm SA. Quel è dapi la stad 2019 vicedirectur en il manaschi. Giusep Fry resta president dal cussegl d’administraziun.
Ina vendita da l’entir manaschi da gastronomia è era stà en discussiun. La firma scriva, ch’i haja dà discurs cun plirs interessents, tranter auter era cun la citad da Turitg. Questas tractativas sajan dentant restadas senza resultat concret.
Fabian Fry vul uss metter pais sin il Hotel Uto Kulm sin l'Uetliberg – il manaschi dal «Giardino Verde» perencunter vegn serrà sin la fin da l'onn. Il restaurant «Gmüetliberg» è vegnì laschà a tschains gia l'entschatta matg.
Giusep Fry aveva adina puspè procurà per lingias grassas, surtut pervi da construcziuns illegalas per schlargiar ses hotel. Dispitas ch'èn savens vegnidas tractadas avant dretgira.
