Suenter ina stagiun d'enviern da success èn ils manaschis d'alloschament svizzers era plain fidanza per la stad. Quai mussa ina retschertga da l'uniun tetgala Hotellerie Suisse tar 140 da lur commembers.
44% dals manaschis dumandads hajan pudì augmentar la svieuta la stagiun d'enviern cumpareglià cun l'onn avant. La stagiun da record 2022/2023 saja pia anc ina giada vegnida surpassada la stagiun d'enviern passada.
In quart dals manaschis ha tenor la retschertga però fatg ina svieuta pli pitschna. Tar hotels ed albierts en citads è quest trend stà pli marcant. Uschia èn quels era stads main cuntents cun la stagiun d'enviern che manaschis en regiuns alpinas.
Per la stad quinta la maioritad da pudair far medem bler svieuta u dapli svieuta cumpareglià cun la stad da l'onn passà. En il medem mument vul mintga segund hotel en Svizra augmentar ils pretschs per chombras la stad – ina raschun èn ils custs da persunal che s'augmentan.
