Il concern da viadis Hotelplan è enavos en las cifras nairas. Il schef da finanzas da Hotelplan, Markus Glesti, ha ditg che l'onn da fatschenta passà saja il meglier dapi l'onn da fatschenta 2006/2007.
Sin la fin d'october 2014, la fin da l'onn da fatschenta, ha Hotelplan pudì augmentar la svieuta per 17% sin 1,7 milliardas francs. La pli gronda cumpart è d'attribuir a la cumpra da l'intermediatur da chasas da vacanzas Inter Chalet.
Il gudogn operativ è s'augmentà da 3,6 sin 26,6 milliuns francs. Hotelplan tutga tar la Migros.
