Hotliers en Svizra negligeschian savens ils bajetgs dals quals els èn dependents. Quai mussa in'enquista che la federaziun Hotelleriesuisse ha fatg tar sias commembras e commembers. Be mintga 5avel manaschi è sanà cumplettamain, a moda energetica. Fertant che 39% n'han anc prendì naginas mesiras en quest senn. 41% dals hoteliers han almain investi en la modernisaziun da tschertas parts dals bajetgs, per uschia sbassar ils custs d'energia.
Vitiers vegn, che 64% dals manaschis stgaudan cun energias fossilas sco ieli u gas. Quai è in factur che gioga in'impurtanta rolla, perquai ch'l turissem d'enviern gioga in'impurtanta rolla en il turissem svizzer.
Renovà regularmain, dentant be a la surfatscha
Bain vegn renovà regularmain en hotels svizzers, dentant betg adina endretg.
En la hotellaria vegn savens renovà en blers pass pitschens e plitost sanà a la surfatscha.
En la hotellaria da stagiun, pussibiliteschia quai in manaschi senza perditas, perquai che las lavurs pon vegnir fatgas cura ch'i ha nagins giasts.
Er Christophe Hans da Hotelleriesuisse conferma: «Sco emprim vegn investì en las parts da l'hotel ch'il giast vesa.» Uschia per exempel en las chombras u tar il wellness. Pir suenter vegnian fatgas las lavurs vi da l'infrastructura. Ma er qua vegnia sco emprim fatg quai che n'è betg cumplitgà, sco per exempel las fanestras.
Meier avertescha dentant che quest agir a curta vista possia avair nauschas consequenzas. Senza ina strategia a lunga vista, creschia il risico che las investiziuns na sajan betg persistentas. En il mender cass sajan quellas perfin persas suenter intgins onns.
Blers hotels vegls – pretensius da sanar
Il basegn d'agir saja considerabel. Bain sajan vegnids bajegiads ils ultims onn novs hotels, sur tut en las citads, quesl èn sin il pli nov stan. Ma da principi sajan ils manaschis svizzers da generaziuns pli veglias.
La vegliadetgna da quels bajetgs saja in problem, di Hans. I dettia fitg blers bels hotels da la Belle Époque en Svizra, ma da sanar quels saja fitg pretensius. Plinavant dettia blers otels dal sonns 60, 70 ed 80. Quels sajan strusch isolads.
Betg las finanzas per sanar
Tenor la retschertga da Hotelleriesuisse èn las finanzas il grond problem. Ils pli blers manaschis n'hajan betg la forza da finanziar ina sanaziun. En las regiuns muntagnardas inditgeschan passa la mesadad dals hoteliers da betg avair ils daners per investiziuns. Radund trais quarts dals hotels en Svizra na tutgan èn sur sasez e n'appartegnan betg ad ina chadaina d'hotels che stat nà meglier a moda finanziala.
Agid dal stadi
Uss vul la hotellaria metter sin l'agid dal stadi. Las duas chombras dal parlament han dacurt surdà ina moziun dal politicher da la Partida socialdemocratica Hans Stöckli al Cussegl federal. Tenor quel duain hotels en la muntogna che vulan sanar, survegnir subvenziuns. Uss vegn elavurada ina proposta.