Primo perquai ch’il pievel ha realisà, quant privlus che quest’iniziativa è. Quella vuleva numnadamain abolir in acquist fundamental da nossa democrazia: il fatg che nus essan tuts eguals davant la lescha. Sche quai fiss ì tenor la voluntad da la PPS avessan en avegnir be anc possessurs e possessuras dal pass svizzer gì quest dretg, il rest da l’umanitad betg pli.
Secundo: ch’il resultat è uschè cler. Ins temeva in resultat stretg, perfin in gea a l’iniziativa.
E sco terz ha fatg plaschair che l’opposiziun n’è betg vegnida be da las partidas politicas ma era e surtut da l’uschenumnada societad civila. La mobilisaziun cunter l’iniziativa è stada impressiunanta ed ella è stada en il medem mument ina mobilisaziun per in stadi da dretg civilisà. La PPS pretenda adina da discurrer per il pievel, da defender l’interess e la voluntad dal pievel encunter las intrigas da l’uschenumnada classe politique.
Per squitschar
Speranza ha ella ussa realisà che quest pievel na vul betg savair novas da l’ideologia da partida, cura ch’i daventa propi impurtant. Las emprimas reacziuns dals iniziants na laschan dentant betg sperar bler.