In'identitad digitala svizra saja necessaria en connex cun la digitalisaziun. Uschia possian ins communitgar sin via electronica cun il stadi e l'economia, e quai a moda segira, han ils responsabels ditg a la conferenza da medias.
La nova interpresa SwissSign Group SA duai sviluppar la SwissID. Purtada vegn quella da l'economia, dentant certifitgada dal stadi. Da quai èn d'accord la Posta Svizra , la SBB, la Swisscom, la Credit Suisse, la Raiffaisen, la UBS, la Banca chantunala turitgaisa, la Mobiliar sco era l'interpresa da finanzas SIX. Finamira da la SwissID è da porscher in'identitad digitala a moda effizienta, utilisabla e simpla.
Segir en il mund digital
Pussaivel da duvrar la carta duai esser tant en Svizra sco era en l'exteriur. Vinavant duai la SwissID porscher a la populaziun svizra la pussaivladad da sa mover a moda segira en in mund digital adina pli malsegir. Ed il client duai pudair duvrar purschidas online a moda pli simpla.
RR novitads 18:00