Igl è chaud - Co ans influenzescha la chalira?

Las consequenzas da las temperaturas autas per durmir

Temperaturas autas pon influenzar il corp uschia ch'ins na po betg sa durmentar bain u era ch'ins vegn adina puspè alert durant la notg. Quai po esser malempernaivel sch'ins leva la damaun ed ins ha il sentiment ch'ins na ha insumma betg durmì bler.  

Christine Blume è psicologa e perscrutadra da durmir. Vers SRF declera ella: Notgs, en las qualas las temperaturas na sa sbassan betg sut 20 grads èn malempernaivlas. Studis han chattà ora ch'ins dovra pli ditg per sa durmentar, vegn pli savens alert. Ultra da quai na dorman ins betg uschè profund.

Plinavant batta il cor pli spert la notg. Quai è in segn per stress. Quai chaschuna en la summa che nus avain la damaun il sentiment da betg avair durmì avunda.

Durmir mal ha er consequenzas per la psica, han ins automaticamain nauscha luna?

Betg automaticamain, ma il privel s’augmenta en mintga cas. I dat studis che mussan ch’ils umans èn in zic pli agressivs ed irritads en cas da chalira. Plinavant na pon ins betg sa concentrar uschè bain. Alura na duess ins era betg esser memia dir cun sasez e dumandar l'abilitad da prestaziun cumplaina.

Tge fiss cussegliabel per pudair durmir meglier?

Tegnair ils mauns ed ils pes en aua tievia po gidar. L’aua na dastga dentant betg esser tut fraida, uschiglio sa serran avainas savens dal tut, e lura survegnan ins mauns e pes fraids. Cun aua tievia po la temperatura dal corp sa sbassar, e silsuenter s’augmentan las schanzas per durmir meglier.

Gida ina bavronda fraida u forsa ina duscha fraida?

Tar la duscha fraida han ins il problem cun las avainas che vegnan pli stretgas. Ella reducescha l'emissiun da chalira sin ils mauns e pes. Cun consumar bavrondas fraidas u in glatsch sa reducescha bain la temperatura dal corp, ma las probandas ed ils probands d'in studi èn pli tard schizunt vegnids pli alerts. Far ina duscha fraida avant che ir a durmir? Na. L'aua na duess betg esser memia fraida, uschiglio lavura il corp encunter il fraid. Ina duscha tievia dentant, pudess tut segund gidar. Forsa era betg sientar il corp cumplettamain. L'aua evapurescha – sco il suaditsch – e sfradenta uschia il corp – ed uschia poi esser ch'ins sa durmenta meglier e dorma stagn e bain.

Situaziun en center da seniors e senioras Rigahaus

«La glieud sua, è pli stancla ed ha pli paucas activitads», resumescha il mainafatschenta Sandro Ursch dal center da seniors e senioras la situaziun actuala da lur manaschi. Cun differentas mesiras vegnian ils abitants e las abitantas protegidas. Per motivar da baiver dapli sajan tut las bavrondas gratuitas durant la stad. Activitads hajan lieu l’avantmezdi ed il nutriment vegnia adattà. Era ventilaturs e parasols sajan in agid.

En il futur veglia il manaschi anc meglierar il clima endadens cun paraids da plantas.

Nauschas consequenzas haja la chalira dentant betg gì fin uss per il center da seniors e senioras. Sandro Ursch raquinta ch’i n’haja circa trais mais dà nagins mortoris ed era betg dapli cas da malsogna ch'uschiglio.

Pertge che betg tuts e tuttas verteschan tuttina bain la chalira

Lea Orlik, ina media da chasa da Cuira rapporta ch'ella n'haja mumentan betg dapli pazients e pazientas en sia pratica ch'uschiglio. Tscherts sintoms remartgia ella però pli savens actualmain: mal il chau, sa sentir sturn, betg pudair far tuttina bler sport e valurs da gnirunchels pli autas pervia da memia pauc liquid en il corp.

Sco persunas spezialmain periclitadas numna la media da chasa persunas cun problems dal cor u dal lom, persunas veglias ed uffants.

En general na pateschian betg tuts e tuttas tuttina fitg da la chalira.

Intginas persunas sentian pli svelt sche la pressiun è pli bassa. Era medicaments ed il nutriment gioghian ina rolla.

Per sa proteger da la chalira cusseglia Lea Orlik da baiver avunda, da star en sumbriva sur mezdi e da serrar ils barcuns durant il di.