Siglir tar il cuntegn

Header

cuntegn

Svizra Ignazio Cassis: ses emprim di

Ier ha Ignazio Cassis survegnì la clav dal Departament federal per affars exteriurs da ses antecessur Dider Burkhalter. Ed oz cumenza il nov cusseglier federal sia carica a Berna. Cun sias empermischuns ha il cusseglier federal mess autas aspectativas.

audio
Mezdi: Emprim di da lavur dal cusseglier federal Ignazio Cassis
ord Actualitad dals 01.11.2017.
laschar ir. Durada: 4 minutas 15 Secundas.

Las aspectativas èn autas per il nov minister da l’exteriur – surtut tge che pertutga il dossier da l’Uniun europeica. Quai vegn ad esser ina da las pli grondas sfidas che spetgan Ignazio Cassis cunquai ch'el ha pliras giadas menziunà ch'i duai dar in buttun da «reset», per quai che pertutga las relaziuns tranter la Svizra e l’UE. Declerà pli exact, tge ch'el manegia cun «reset» n'ha el però anc betg.

Cler è che Ignazio Cassis stat en per la via bilaterala cun l’Uniun europeica. Per el saja quai la gista via per reglar las relaziuns tranter la Svizra e l’Uniun Europeica.

Cusseglier sin lingia da partida

Dal Tessinais po ins spetgar ina politica drizzada ferm vers la dretga. Sia partida, la PLD, spera dad avair cun el in minister da l’exteriur ch'è sin lingia da partida, oravant tut quai che pertutga il dossier da l’Uniun europeica. Cun l’antecessur da Cassis, Didier Burkhalter hai numnadamain adina puspè dat discrepanzas tranter el e sia partida areguard la direcziun da la politica invers l’UE.

Per giuditgar ad Ignazio Cassis sco minister d’exteriur èsi uss però anc massa baud.

Engaschi per las minoritads

Grondas spetgas en Cassis datti er en connex cun las minoritads. Plitost da la vart dal Tessin. Suenter ch'il Tessin n'ha gì 20 onns nagin cusseglier federal, speran ils Tessinais da vegnir udids meglier a Berna. Quai ha Cassis era empermess. Dentant ha el era empermess a las minoritads talianas en il Grischun sco era als Rumantschs da dar ad els ina vusch. In dialog regular duai promover ina collavuraziun pli stretga cun ils represchentants da las minoritads. En mintga cas badan ins che las minoritads stattan a cor al nov cusseglier federal.

RR actualitad 12:00

Artitgels legids il pli savens