Siglir tar il cuntegn
Inhalt

Svizra Il cas da l’AutoDaPosta SA va dad uffizi tar uffizi

L’Uffizi federal da traffic (BAV) haja cun raschun purtà plant tar la Procura publica federala – ha cussegliera federala Doris Leuthard ditg. Lezza haja dentant respundì da betg esser responsabla: Il BAV stoppia investigar sez la chaussa.

Logo AutoDaPosta.
Legenda: L'uffizi na sappia betg examinar sez il cas. El saja gia la controlla tar el. Keystone

L’Uffizi federal da traffic (BAV) aveva purtà plant tar la Procura publica pervia da las cudeschaziuns dubiusas da l’AutoDaPosta SA. Quella aveva però inditgà ch'ella na saja betg responsabla per la chaussa. L'uffizi stoppia investigar sez en chaussa. Quai n'è tenor cussegliera federala Doris Leuthard betg pussaivel, perquai che l'uffizi è gia responsabel per la surveglianza. Dentant examineschia il Cussegl federal sch'in auter uffizi pudess surprender il cas.

En vista als blers mecanissems da controlla è Leuthard anc adina surstada sco questa cugliunaria saja insumma stada pussaivla. Perquai pretenda la cussegliera federala da sclerir il cas dal tuttafatg. Ins stoppia sclerir, quant ch'il management saveva ed schi haja dà in problem intern tar l'interpresa. Ins stoppia avair scleriment per pudair decider davart consequenzas persunalas e giuridicas. Leuthard quinta ch'ins haja en sis enfin otg emnas ils emprims resultats. Pervia dal donn da reputaziun ch'il cas haja, saja impurtant d'agir spert.

Gruppa d'experts independenta

L'administraziun da l'AutoDaPosta SA vul surdar il cas ad ina gruppa d'experts independenta. La ministra da traffic è perina cun questa decisiun, ha ella ditg en in'intervista cun la gasetta «Neue Zürcher Zeitung».

Plinavant haja ses departament incumbensà ina Task-Force che duai sclerir, sche la Confederaziun e l'interpresa sezza stoppian agir. Per ella saja er il Cussegl federal responsabel per il cas. Ils affars d'interpresas federalas vegnian preparads cun il departament da traffic e l'administraziun da finanzas. Ella na saja betg ina da quellas che sa retiria da responsabladad, uschia Doris Leuthard.

Problematica cun la cudeschaziun

L’Uffizi federal aveva l’onn passà scuvert che l’AutoDaPosta SA aveva fatg cudeschaziuns dubiusas è spustà gudogns. Uschia aveva l'interpresa retratg subvenziuns memia autas da la Confederaziun, ils chantuns e las vischnancas.

RR novitads 12:00