Appellant per ina politica pli effectiva da clima, van scolaras e scolars tras las vias en Svizra, en l'Europa ed era sin il rest dal mund. Ma i n'èn betg mo ils giuvens che èn preoccupads e vulan reducir las emissiuns da CO2. Persunas da tut las vegliadetgnas partan ils quitads da la giuventegna e sustegnan ella tar ses protests sin via.
Che il stgaudament dal clima è in problem, concedan era las parlamentarias ed ils parlamentaris grischuns. Auter che divers collegas da sia partida na dementescha il cusseglier naziunal dal PPS Heinz Brand betg il stgaudament dal clima.
Ils protests èn in instrument effectiv per far attent sin in problem ch'exista vairamain.
Uschè intensiv sco ils protests dal clima vegnian vivids saja quai dentant plitost in hype di Heinz Brand. Però il politicher grischun è dal avis, ch'il problem dal stgaudament da clima saja qua e da sensibilisar cun protests la populaziun saja effectiv.
Mesiras custan
Durant la sessiun dal parlament federal èn mintga damaun marvegl da vesair giuvnas e giuvnas sin la plazza federala a Berna cun placats che appelleschan ils parlamentaris e las parlamentarias che van en ed or da la chasa federala d'agir en chaussa clima. Duri Campell di ch'el haja tschiffà la chaschun e discurri mintga damaun cun ils giuvens e las giuvnas che protestan.
Jau sper che tut quels che van a demonstrar san ir enturn cun las consequenzas sch'ins prenda mesiras per proteger il clima. Quai custa numnadamain.
Campell sustegnia il cumbat encunter il stgaudament dal clima. Dentant stoppian ils giuvens esser conscient che mesiras per reducir il CO2 custan. En ils discurs davant la Chasa federala na sajan betg tut ils giuvens stads d'accord cun custs pli auts per sgols di il cusseglier naziunal dal PBD.
Giuvens duain tegnair dir
Grond gust da l'engaschi sin la plazza federala sco era dals protests dal venderdi ha Silva Semadeni.
Ils giuvens tegnan dir dapli emnas. Jau sun fitg cuntenta ch'ils giuvens èn svegliads e s’engaschan per il clima e cun quai per lur futur.
La Cussegliera naziunala dal PS spera ch'ils giuvens restian dirs e tegnan tras ils protests enfin che tut las politicras e politichers èn pronts da prender mesiras effectivas.
Mo cun clamar èsi betg fatg
Udi il clom dals giuvens ha era il Cusseglier naziunal da la PCD Martin Candinas. Ils protests sajan forsa schon in zic in hype, dentant la politica viva era da quels hypes di Candinas.
Il pli impurtant è che ils giuvens e las giuvnas sa tegnan vi da quai ch'els ed ellas pretendan. I fiss massa simpel da mo pretender da la politica d'agir.
Quai saja gist ed endretg ch'ins pretenda da la politica agiunscha il Sursilvan. Però ina gronda part per proteger il clima saja er en la responsabladad da mintgina e mintgin.
Ils parlamentaris e la parlamentaria grischuna èn d'accord, ch'ils protests fan dapli fieu sut il tgil a la politica en chaussa protecziun da clima. L'engaschi politic da la giuventetgna vegn stimà. Tge mesiras ch'il parlament vegn effectiv a far resta per il mument dentant avert.
Ord ina hai dà millis
Ella ha muventà giuvens sin tut il mund dad ir sin via per proteger il clima. Ils 20 d'avust 2018 ha Greta Thunberg cumenzà a protestar per il clima. Là era la svedaisa da 16 onns anc per suletta cun ses protest. Suenter ses pled a la conferenza dal clima da las Naziuns Unidas a Katowice è Greta dentant vegnida enconuschenta sin l'entir mund. Ed uschia è era sa furmà in moviment mundial enturn la giuvna svedaisa. Era al WEF a Tavau ha ella tegnì in pled e demonstrà ensemen cun scolaras e scolars da Tavau.
RR actualitad 07:10
