Siglir tar il cuntegn

Svizra Il clown Dimitri n'è betg pli

Ina agenta da la famiglia artistica ha confermà tals rapports da Radiotelevisione svizzera. Dimitri è mort mardi saira. Anc la dumengia saira era el stà sin tribuna sin il Monte Verità dal gieu el liber Sogni di un'altra vita.

dimitri
Legenda: Il clown Dimitri, qua tar l'avertura da sia scola e ses teater a Versico (2010). Keystone
Dimitri sin tribuna cun ghitarra.
Legenda: Dimitri durant ina preschentaziun cun sia famiglia. Keystone

Dapi ses 24avel anniversari ha il probabel pli enconuschent clown svizzer procurà per risadas tar ses publicum. Savi ch'el veglia daventar clown, ha Dimitri però gia en la vegliadetgna da 7 onns cura ch'el ha vesì il clown svizzer Andreff en il circus Knie. L'esser legher quai saja sia vita, sia passiun, sco el ha adina ditg.

Gia durant ses emprendissadi sco vaschler frequentava Dimitri Jakob Müller lecziuns da teater, musica, balett ed acrobatica. Da quel temp ha el scaffì sias emprimas curtas rollas comicas e nummers da clown e pantomima. Suenter ha el tranter auter studegià a Paris pantomima, acrobatica ed artistica sin la suga.

Si'ovra da vita

A partir dal 1959 è el sta pliras giadas sin turna tras l'entir mund, tranter auter er trais giadas cun il circus Knie. Il 1971 ha Dimitri fundà ensemen cun sia consorta Gunda il Teatro Dimitri a Verscio. Il 1975 è lura la Scuola Teatro Dimitri vegnia vitiers ch'è oz ina scol'auta per teater da moviment e creaziun da teater.

Dimitri cun sia consorta Gunda.
Legenda: Dimitri cun sia consorta Gunda a chaschun da l'avertura dal mueum da comica Parco del Clown gist sper sia scola da teater. Keystone

Dasper la lavur sco autur, reschissur e decoratur da tribuna en ses agen teater era Dimitri er adina puspè da vesair sin tribunas da l'art pitschen

Il 2009 ha el survegnì il Swiss Award per cultura ed il 2013 il Swiss Award per si'ovra da vita. Quai sper divers auters premis ed onoraziuns.

Ses ultim salto ha il pli enconuschent clown svizzer fatg en la vegliadetgna da 50 onns en in teater a Basilea. E malgrà ch'i era ses ultim salto, na pensava Dimitri anc ditg betg da chalar. El vegnia a far vinavant fin ch'el dettia enturn, ha el fatg a savair lezza giada.

Regurdientschas vid il clown Dimitri

(ord la Tagesschau dals 20-04-2016)

Legende: Video Regurdientschas vid Dimitri abspielen. Laufzeit 2:14 Minuten.
Dals 20.07.2016.

RR novitads 09:00