«Il contract social svizzer sto vegnir renovà»

Era ils pli debels duajan pudair profitar dals avantatgs dal commerzi internaziunal ha ditg il cusseglier federal Alain Berset a la radunanza da delegads da la PS svizra a Cuira.

Berset al pult da discurrer entamez ses discurs. Bild in Lightbox öffnen.

Legenda da maletgs: «Il contract social svizzer sto vegnir tractà danovamain» dì cusseglier federal Alain berset a la radunanza da delegas da la PS a Cuira. Keystone

Il Brexit saja l’expressiun da la malsegirezza en la populaziun, ha ditg il cusseglier federal Alain Berset in sonda a Cuira. Quella malsegirezza na regia betg mo in Gronda Britannia.

Blers stadis sajan our da l’equiliber tranter societad ed economia, giuven e vegl, saun e malsaun. Era en Svizra saja blessà il sentiment per giustia sociala.

PS vul far politica d'opposiziun

En pli ha annunzià la partida socialdemocratica svizra da vulair far en l'avegnir ina politica d'opposiziun malempernaivla - quai sco reacziun sin il spustament a dretga en il parlament federal.

La partida vul sa dustar cunter l'engurdientscha da las lobbis pussantas ed interess singulars. Quai han decidì ils delegads da la PS a lur radunanza a Cuira.

Lantschà referendum cunter l'imposiziun da taglia sin interpresas III

Sco instrument principal per lur politica d'opposiziun vesan ils socialdemocrats ils referendums. Ils delegads han lura era gist decidì da lantschar in referendum cunter la refurma da l'imposiziun da taglia sin interpresas III.

Ultra da quai è la SP per l’iniziativa «AVSplus – per ina AVS ferma», lantschada da sindicats. Era GEA di la PS a l’iniziativa «Economia Verda» che pretenda in’economia persistenta ed effizienta. NA dian ils delegads da la PS a la lescha davart il servetsch da spiunadi.

RR novitads 15:00